नाशिक शिक्षक मतदारसंघात किशोर दराडे विजयी

अंबड येथील वखार महामंडळाच्या गोदामात सोमवारी सकाळी आठ वाजता मतमोजणी प्रक्रियेला सुरुवात झाली होती. नाशिक शिक्षक मतदारसंघात एकूण ६४ हजार ८५३ मतदान झाले. यातील ६३ हजार १५१ मते वैध तर, १७०२ मते अवैध ठरली. विजयासाठी ३१ हजार ५७६ मतांचा कोटा निश्चित करण्यात आला आहे. रिंगणात २१ उमेदवार होते. पहिल्या पसंतीक्रमाच्या मोजणीत शिंदे गटाच्या किशोर दराडे यांना २६२४७ मते मिळाली. भाजपशी संबंधित अपक्ष उमेदवार विवेक कोल्हे १७३७२ मते मिळवून द्वितीयस्थानी राहिले. शिवसेना ठाकरे गटाचे उमेदवार ॲड. गुळवे यांना १६२८० मते मिळाली. या फेरीत उमेदवाराला कोटा गाठता न आल्याने दुसऱ्या पसंतीक्रमाची मोजणी सुरू करण्यात आली. सकाळपर्यंत ही मतमोजणी सुरू होती. किशोर दराडे यांनी मतांचा कोटा पूर्ण केल्यामुळे ते विजयी झाल्याचे निवडणूक अधिकाऱ्यांकडून सांगण्यात आले.

हेही वाचा – नाशिक: नवीन कायद्यांविरोधात आंदोलन

हेही वाचा – नवीन कायद्यांनुसार पहिल्याच दिवशी पंचवटी पोलीस ठाण्यात दोन गुन्ह्यांची नोंद

मतमोजणीला विलंब

मतमोजणीत तीन केंद्रांवर पाच मतपत्रिका अधिक आढळल्याने काही काळ गोंधळाची स्थिती निर्माण झाली होती. चौकशीअंती संबंधित मतपत्रिकांवर अनुक्रमांकाची छपाई झाली नसल्याचे उघड झाले. मतपत्रिकेमागे अधिकाऱ्यांची स्वाक्षरी आणि शिक्का होता. त्यामुळे या मतपत्रिकाही वैध ठरून शिवसेना ठाकरे गटाचा आक्षेप निकाली निघाला. यामुळे मतमोजणीला विलंब झाला.