नाशिक – देवळाली कॅम्पजवळील नानेगाव येथे वन विभागाने लावलेल्या पिंजऱ्यात मंगळवारी बिबट्या जेरबंद झाला. नानेगावातील भवानी नगरमधील मनोहर शिंदे यांच्या शेतात बिबट्या आठवडाभर मुक्तपणे फिरत होता. बिबट्या वारंवार दिसत असल्याने परिसरातील नागरिकांची भीतीने गाळण उडाली होती. सर्वांनाच जीव मुठीत घेवून काम करावे लागत होते.
वन विभागाला या विषयी माहिती दिली असता अधिकारी अनिल अहिरराव आणि सहकाऱ्यांनी शिंदे यांच्या पडीक जागेवर पाच दिवसांपूर्वी पिंजरा लावला. मंगळवारी पहाटे पिंजऱ्याच्या दिशेने बिबट्याच्या डरकाळीचा आवाज येऊ लागला. शिंदे यांनी वनविभागाला याची माहिती दिली. वन अधिकाऱ्यांचे पथक घटनास्थळी दाखल झाले. आठ ते नऊ वर्षांचा नर जातीचा बिबट्या पिंजऱ्यात अडकला असून त्याला सुरक्षितरित्या गंगापूर येथील रोप वाटिकेत उपचारासाठी नेण्यात आले आहे. उपचारानंतर त्याला नैसर्गिक अधिवासात सोडण्यात येईल.