नाशिकमध्ये मराठा समाजाचे नेते मनोज जरांगे आणि राष्ट्रवादी काँग्रेसचे ( अजित पवार गट) नेते छगन भुजबळ यांचे समर्थक आमने-सामने आले होते. यावेळी दोन्ही गटाकडून एकमेकांविरोधात जोरदार घोषणाबाजी करण्यात आली. त्यामुळे शिवसृष्टी परिसरात तणावाचे वातावरण निर्माण झाल्याचं बघायला मिळालं. दरम्यान, पोलिसांनी वेळीच हस्तक्षेप करत परिस्थिती नियंत्रणात आणण्याचा प्रयत्न केला.
मनोज जरांगे दाखल होताच समर्थकांकडून घोषणाबाजी
मिळालेल्या माहितीनुसार मनोज जरांगे पाटील नाशिकमधील शिवसृष्टीला भेट देण्यासाठी दाखल झाले होते. यावेळी छगन भुजबळ यांचे समर्थकही याठिकाणी उपस्थित होते. मनोज जरांगे पाटील या परिसरात दाखल होताच, दोन्ही गटाच्या समर्थकांकडून एकमेकांविरोधात जोरदार घोषणाबाजी करण्यात आली. त्यामुळे काही काळ तणावाचं निर्माण झालं.
हेही वाचा – उड्डाणपुलावरील दुरुस्ती कामामुळे गोंधळ; पूर्वकल्पना नसल्याने वाहनधारकांची गैरसोय, वाहतूक कोंडीत भर
भुजबळांच्या समर्थकांनी मनोज जरांगे यांचे पोस्टर फाडल्याचा आरोप
दरम्यान, या घटनेनंतर छगन भुजबळ यांच्या समर्थकांनी मनोज जरांगे यांचे पोस्टर फाडले असून शिविगाळ केली, असा आरोप मनोज जरांगे पाटील यांच्या समर्थकांनी माध्यमांशी बोलताना केला. तसेच छगन भुजबळ यांच्या समर्थकांवर कारवाई करावी, अशी मागणी करत त्यांनी शिवसृष्टी परिसरातच ठिय्या आंदोलन सुरु केली. याशिवाय काही मराठा कार्यकर्त्यांनी मनमाड-नगर महामार्गही रास्तारोको आंदोलन केलं. जोपर्यंत छगन भुजबळ यांच्या समर्थकांवर कारवाई होत नाही, तोपर्यंत आम्ही घरी जाणार नाही, अशी भूमिका या कार्यकर्त्यांनी घेतली.
मनोज जरांगेंकडून शांतता राखण्याचं आवाहन
अखेर मनोज जरांगे पाटील यांनी मराठा आंदोलकांची समजूत काढत शांतता राखण्याचं तसेच आंदोलन थांबवण्याचं आवाहन केलं. त्यानंतर मराठा आंदोलकांनीही मनोज जरांगे यांच्या विनंतीला मान देत आंदोलन थांबवण्याचा निर्णय घेतला.
