मनपा आयुक्तांचे उद्यान विभागावर ताशेरे उद्याने, जॉगिंग ट्रॅकला बकाल स्वरुप

विविध भागांतील उद्याने व जॉगिंग ट्रॅकच्या दुरावस्थेविषयी नागरिक व संघटनांकडून तक्रारी होत आहेत. प्रमुख उद्यानांच्या देखभालीची जबाबदारी खासगी ठेकेदारांकडे आहे. मात्र त्यांच्याकडून अटी-शर्तीनुसार कामे होत नाहीत. त्यावर संबंधित विभागाचे उद्यान निरीक्षक व विभागप्रमुख म्हणून उद्यान अधीक्षक यांचे नियंत्रण नसल्याचे दिसून येते, असे आयुक्त खत्री यांनी सूचित केले. उद्यान विभागाच्या कामात तातडीने सुधारणा करण्याचे निर्देश दिले आहेत.

हेही वाचा…नाशिक : निकृष्ट भोजन निषेधार्थ आदिवासी विद्यार्थ्यांचे आंदोलन

उद्यान व जॉगिंग ट्रॅकवरील झाडांना वेळेवर पुरेसे पाणी दिले जात नाही. शोभेची झाडे व हिरवळीची छाटणीही होत नाही. साफसफाईअभावी पालापाचोळा पडून राहतो. अनेक ठिकाणी पायी चालण्याच्या मार्गावर फरशा निघाल्या आहेत. उद्यानातील खेळण्यांची तोडफोड होऊनही त्यांच्या दुरुस्तीकडे दुर्लक्ष केले जाते. उद्यान व जॉगिंग ट्रॅकवरील काही दिव्यांची तोडफोड झाली तर, काही दिवे कित्येक दिवसांपासून बंद आहेत.

हेही वाचा…नाशिकरोड कारागृहातील जमिनीत दोन भ्रमणध्वनी, गुन्हा दाखल

अनेक मोठमोठ्या उद्यानांमध्ये सुरक्षारक्षकाची नेमणूक केलेली नसल्याने त्याठिकाणी नासधूस होत असून अनेक वेळेस चोऱ्या देखील होत असतात. उद्यान व ट्रॅकवरील झाडांच्या संरक्षण जाळ्या तुटलेल्या किंवा काही ठिकाणी चोरीस गेलेल्या आहेत. संरक्षक भिंतींची अवस्था फारशी वेगळी नाही. सुरक्षारक्षक नियुक्त नसल्याने उद्यानात नासधूस व चोऱ्या होतात. या तक्रारींची दखल घेत आयुक्त खत्री यांनी उद्यान विभागाच्या कामात सुधारणा करण्याचे निर्देश दिले आहेत.

उद्यान निरीक्षकांचे नाव, भ्रमणध्वनी क्रमांकाचे फलक

उद्याने व जॉगिंग ट्रॅकच्या प्रवेशद्वारावर दर्शनी भागात आठ दिवसांत संबंधित विभागाचे निरीक्षक व उद्यान अधीक्षकांच्या नावासह भ्रमणध्वनी क्रमांकाचे फलक लावण्याचे निर्देश देण्यात आले आहेत. जेणेकरून नागरिकांना संपर्क साधता येईल. उद्यान अधीक्षकांनी उद्यान निरीक्षकांना त्यांच्या अधिपत्याखालील उद्याने व जॉगिंग ट्रॅकच्या सुधारण्यासाठी कामाच्या वेळा निश्चित करून द्याव्यात. स्वतः सर्व विभागात नियमित भेटी देऊन तेथील व्यवस्था व सुधारणेची पाहणी करावी, असे बजावण्यात आले आहे. याचा साप्ताहिक अहवाल सादर करण्याचे सूचित करण्यात आले आहे.