नाशिक : अभाविपचे आरोग्य विद्यापीठात आंदोलन, शिक्षण मंत्र्यांसह कुलगुरुंकडून दखल

येथील महाराष्ट्र आरोग्य विज्ञान विद्यापीठात अभाविपने निमवैद्यकीयचे शिक्षण घेणाऱ्या विद्यार्थ्यांच्या समस्या सोडविण्यासाठी आंदोलन केले. विद्यापीठाच्या प्रशासकीय इमारतीत सुरक्षा रक्षकांच्या बंदोबस्ताला न जुमानता प्रवेश करत कार्यकर्त्यांनी घोषणाबाजी केली. शैक्षणिक अर्हतेनुसार पदभरती, निमवैद्यकीय विद्यार्थ्यांशी होणारा दुजाभाव, विद्यार्थ्यांना शिकवण्यासाठी शिक्षक नसणे, नियमित अध्यापन न चालणे, असे विविध विषय मांडण्यात आले. आरोग्य विज्ञान विद्यापीठाच्या माध्यमातून १४ विविध प्रकारचे निमवैद्यकीय चार वर्षांचे पदवी अभ्यासक्रम सुरू करण्यात आले आहेत. रुग्णसेवेसाठी राज्यातील विविध रुग्णालयांमध्ये डॉक्टरांना मदतनीस म्हणून प्रशिक्षित कर्मचारी मिळावेत, अशी या अभ्यासक्रमाची रचना करण्यात आली असली तरी प्रत्यक्षात तसे होताना दिसत नाही. महाराष्ट्रातील कुठल्याही शासकीय वैद्यकीय महाविद्यालयामध्ये या विद्यार्थ्यांना नियमित अध्यापन करण्यात येत नाही. इतर वैद्यकीय विद्यार्थ्यांच्या तुलनेत निमवैद्यकीय विद्यार्थ्यांशी सतत दुजाभाव करण्यात येतो. कुठल्याही महाविद्यालयात या विद्यार्थ्यांना शिकविण्यासाठी स्वतंत्र शिक्षक उपलब्ध नसून स्वतंत्र वर्ग आणि वसतिगृहही महाविद्यालयांमध्ये नाही. हा अभ्यासक्रम व्यावसायिक अभ्यासक्रमांच्या यादीत समाविष्ट नसल्याने शिष्यवृत्ती किंवा मुलींना मोफत शिक्षणाची योजना लागू होत नाही.

हेही वाचा – मंत्री गुलाबराव पाटील यांचा जळगाव जिल्ह्यात अनोखा विक्रम

याउलट पहिल्या वर्षापासूनच अध्यापन न करता विद्यार्थ्यांना रुग्णालयात सर्व महिन्यांमध्ये सेवा देण्यासाठी भाग पाडले जाते. एकिकडे मूलभूत सोयीसुविधांचा अभाव असताना अभ्यासक्रमाचे शुल्क मात्र दरवर्षी वाढतच असल्याचे अभाविपने म्हटले आहे. आंदोलनावेळी अभाविपच्या कार्यकर्त्यांनी थेट रुग्णवाहिका विद्यापीठात आणली. यावेळी विद्यापीठाविरोधात जोरदार घोषणाबाजी करण्यात आली. आंदोलनादरम्यान वैद्यकीय शिक्षणमंत्री हसन मुश्रीफ यांनी भ्रमणध्वनीवरुन विद्यार्थ्यांशी संवाद साधून मागण्यांविषयी २८ जानेवारी रोजी अभाविपचे कार्यकर्ते, विद्यार्थी प्रतिनिधी आणि अधिकारी अशी एकत्रित बैठक घेण्याचे आश्वासन दिले.

दरम्यान, कुलगुरू लेफ्टनन्ट जनरल माधुरी कानिटकर (निवृत्त) यांनी विद्यार्थ्यांशी दृकश्राव्य संवाद साधत विद्यापीठस्तरीय सर्व प्रश्न सोडविण्यासाठी २४ जानेवारी रोजी बैठक घेण्याचे आश्वासन दिल्यानंतर आंदोलन तात्पुरते स्थगित करण्यात आले.

हेही वाचा – नंदुरबारमध्ये पोलिसांवर दगडफेकप्रकरणी १८ जण ताब्यात

आंदोलनात अभाविपचे पश्चिम महाराष्ट्र प्रदेश मंत्री अथर्व कुलकर्णी, प्रदेश सहमंत्री ओम मालुंजकर आणि मेघा शिरगावे, नाशिक महानगर सहमंत्री यश गुरव, व्यंकटेश अवसरकर आदींसह सर्व शासकीय वैद्यकीय महाविद्यालयातील निमवैद्यकीयचे शिक्षण घेणारे विद्यार्थी उपस्थित होते.