नाशिकमध्ये आगीत जुना वाडा भस्मसात, आसपासच्या रहिवाशांना सुरक्षित बाहेर काढले

रविवार पेठेतील कंसारा मंगल कार्यालयासमोर जुनी तांबट अळीत हा वाडा आहे. विठ्ठलभाई तांबट यांचा हा जुना वाडा पडिक स्वरुपात आहे. तिथे कोणी रहात नव्हते. पहाटे साडेपाच वाजता या वाड्यास आग लागली. ही बाब लक्षात येताच आसपासच्या नागरिकांनी या घटनेची माहिती पंचवटी अग्निशमन दलास दिली. काही वेळात या केंद्राचे दोन व मुख्यालयाचा एक असे तीन पाण्याचे बंब घटनास्थळी दाखल झाले. मध्यवर्ती भागातील अतिशय दाट वस्तीचा हा परिसर आहे.

हेही वाचा…मंत्रिमंडळाआधीच पालकमंत्रिपदासाठी मोर्चेबांधणी, अजित पवार गटाची शिंदे गटासह भाजपला शह देण्याची तयारी

आग लागलेल्या वाड्याजवळील दुसऱ्या वाड्यात पाच ते सहा कुटुंब वास्तव्य करतात. प्रारंभी त्यांना सुरक्षितपणे बाहेर काढण्यात आल्याची माहिती अग्निशमन दलाचे संजय कानडे यांनी दिली. ज्या वाड्याला आग लागली, त्याच्या बांधणीत मोठ्या प्रमाणात सागवानी लाकडाचा वापर झालेला आहे. त्यामुळे आग पसरली. तिच्यावर नियंत्रण मिळवण्यास बराच वेळ लागला. अडीच तासाच्या अथक प्रयत्नानंंतर आग नियंत्रणात आली. तोपर्यंत वाड्याचा बराचसा भाग भस्मसात झाला होता. आग विझवल्यानंतरही वाड्यातील लाकूड अधुनमधून पेट घेत होते. त्यामुळे बराच वेळ पाण्याचा मारा करावा लागला. आग नेमकी कशामुळे लागली त्याची स्पष्टता झालेली नाही. या दुर्घटनेत कोणतीही जिवितहानी झाली नाही. जुन्या वाड्याच्या दोन्ही बाजुने पाणी मारून आगीची झळ आसपासच्या भागाला बसणार नाही याची दक्षता घेण्यात आल्याचे या विभागाचे के. पी. पाटील यांनी सांगितले