शिवजयंतीनिमित्त झेंडे लावताना मालमोटारीच्या धडकेने क्रेन उलटली… दोघांचा मृत्यू, चार जखमी

मनमाड- नांदगाव रस्त्यावर डमरे मंगल कार्यालयासमोर रविवारी रात्री हा अपघात झाला. शिवजयंतीनिमित्त मनमाड – नांदगाव मार्गावरील पथदीपांना भगवे झेंडे लावण्याचे काम करण्यात येत होते. पथदीप उंच असल्याने त्यासाठी क्रेनची मदत घेतली जात होती. क्रेनवर पाच जण झेंडे लावण्याचे काम करत होते. हे काम चालू असताना भरधाव आलेल्या मालमोटारीची क्रेनला धडक बसली. ही धडक इतकी जोरदार होती की, क्रेन रस्त्यावरून गेलेल्या अतिदाबाच्या तारांवर आदळल्यामुळे विजेचा धक्का बसला. या अपघातात. चार्ल्स फ्रान्सिस आणि अजय पवार या दोघांचा जागीच मृत्यू झाला. ब्रोनो फ्रान्सिस, सचिन हाटकर, क्रेन चालक रणजीत कुमार आणि मालमोटार चालक प्रभाकर ताजणे असे चार जण गंभीर जखमी झाले. जखमींना उपजिल्हा रुग्णालयात प्राथमिक उपचार करून मालेगाव येथील रुग्णालयात पाठवण्यात आले. या प्रकरणी मनमाड पोलीस ठाण्यात अपघाताचा गुन्हा दाखल करण्यात आला आहे. पोलीस निरीक्षक विजय करे यांच्या मार्गदर्शनाखाली पुढील तपास पोलीस कर्मचारी करत आहेत.