लोकसत्ता प्रतिनिधी
नाशिक : जिल्ह्यात वेगवेगळ्या घटनांमध्ये स्थानिक कांदा आणि डाळिंब व्यापाऱ्यास लाखो रुपयांना परप्रांतीय व्यापाऱ्यांकडून फसविण्यात आले असून संशयितांविरूध्द पोलीस ठाण्यात गुन्हा दाखल करण्यात आला आहे.
बागलाण तालुक्यातील संदीप देवरे (३८) हे फळ व्यापारी आहेत. संशयित जसिम शेख (रा. पश्चिम बंगाल) याने देवरे यांचा विश्वास संपादन करुन त्यांच्याकडून डाळिंब खरेदी केले. यासाठी २१,७९,३८३ रुपये रक्कम ठरली. डाळिंब खरेदीनंतर शेखने पैसे देण्यास टाळाटाळ केली. आपली आर्थिक फसवणूक झाल्याचे लक्षात येताच देवरे यांनी सटाणा पोलीस ठाण्यात शेखविरूध्द तक्रार दिल्यानंतर फसवणुकीचा गुन्हा दाखल करण्यात आला.
आणखी वाचा-बाळ बदलप्रकरणी ११ जणांविरुध्द शिस्तभंगाची कारवाई, जिल्हा रुग्णालयातील प्रकार
दुसरी घटना सिन्नर तालुक्यात घडली. मुकेश दराडे (४४, रा. नांदुरशिंगोटे) हे कांदा व्यापारी आहेत. त्यांनी तेलंगणा येथील अनुसाई ट्रेडर्स कंपनीचे शेख बाबु यांच्याशी साई सन्मान फार्मर प्रोड्युसर कंपनीच्या मार्फत व्यवहार केला. यासाठी १० लाख ४७ हजार १६५ रुपये ठरले. यातील तीन लाख, ३२ हजार ९३५ रुपये दराडे यांना देण्यात आले. उर्वरीत सात लाख, १४ हजार २२७ रुपये संशयिताने दिले नाही. फसवणूक झाल्याचे दराडे यांच्या लक्षात येताच वावी पोलीस ठाण्यात तक्रार केल्यावर गुन्हा दाखल करण्यात आला.
