जळगाव : सोने, चांदीच्या दराची पुन्हा उच्चांकी वाटचाल, आता ‘इतकी’ आहे किंमत

आठवडाभरापासून सोने व चांदीच्या दरात सातत्याने वाढ होत आहे. सोने गेल्या दोन-अडीच वर्षांतील उच्चांकी दरावर आहे. ३१ डिसेंबर रोजी १५० रुपयांची वाढ होऊन सोने दर प्रतितोळा ५५ हजार ४०० रुपयावर गेले होते. यानंतर एक आणि दोन जानेवारी रोजी दर स्थिर राहिले. चार जानेवारीला सोन्याचे दर प्रतितोळा ५६ हजार होते. त्यात २०० रुपयांची वाढ होऊन गुरुवारी सकाळच्या सत्रात सोन्याचे दर प्रतितोळा ५६ हजार २०० रुपये झाले. सात ऑगस्ट २०२० रोजी सोने दर प्रतितोळा ५७ हजार २०० रुपयांपर्यंत गेले होते. आता सातत्याने सोन्याच्या दरात होत असलेल्या वाढीमुळे सोने पुन्हा ५७ हजारांचा टप्पा गाठण्याची शक्यता वर्तविली जात आहे.

हेही वाचा – आदिवासी विकास मंत्र्यांच्या जिल्ह्यातील आश्रमशाळेत गुरांसह शेळ्यांचा वावर; स्नानगृह, शौचालयाअभावी विद्यार्थिनींची गैरसोय

सोमवारी चांदीचे दर प्रतिकिलो ६८ हजार १०० रुपये होते. ते मंगळवारी ६९ हजार ७२२ रुपयांवर गेले. बुधवारी दरात ८०० रुपयांची घसरण होऊन ते ६९ हजार २०० रुपये प्रतिकिलो होते. गुरुवारी सकाळच्या सत्रात चांदीचे दर ८०० रुपयांनी वाढले. चांदीचे दर महिनाभरात प्रतिकिलो सहा हजार रुपयांनी वाढले.

आंतरराष्ट्रीय सोने बाजारात जगभरातील प्रमुख बँकांकडून सोन्याच्या खरेदीत वाढ झाल्याने सोन्याच्या दरात वाढ होत आहे, तर चीनकडून इलेक्ट्रॉनिक्स उत्पादनांसाठी चांदीची मागणी वाढली असल्याने दरात मोठी वाढ झाल्याचे सराफ व्यावसायिकांनी सांगितले. भारताचा रुपया इतर देशांच्या तुलनेत मजबूत आहे. भारतीय ग्राहकांकडून सोन्याच्या दरात वाढ होत असल्याने चांदीची मागणी वाढती आहे. परिणामी दरात वाढ झाल्याचे सराफ व्यावसायिक कपिल खोंडे यांनी सांगितले.