जळगाव : रस्तेकामांची गुणवत्ता न राखल्यास मक्तेदारावर कारवाई, जिल्हाधिकाऱ्यांकडून पाहणी

शहरात ३८ कोटींच्या निधीतून ४९ रस्त्यांची कामे केली जात आहेत. पैकी दहा रस्त्यांची बीएमपर्यंत कामे झाली आहेत. इतर निधीतून मंजूर रस्तेकामांच्या गुणवत्तेबाबत जळगावकरांच्या वाढत्या तक्रारी आहेत. त्यांची दखल घेत जिल्हाधिकारी मित्तल यांनी शुक्रवारी सायंकाळी क्रीडा संकुलाकडून रिंग रोडकडे जाणारा मार्ग, रिंग रोड चौफुली ते गणेश कॉलनी, नवसाचा गणपती मंदिर, एस. एम. आय. टी. महाविद्यालय, दूध फेडरेशन, जिल्हा रुग्णालय यांसह इतर परिसरातील रस्त्यांवर उतरत पाहणी केली.

यावेळी महापालिकेचे शहर अभियंता चंद्रकांत सोनगिरे, सार्वजनिक बांधकाम विभागाचे अभियंता योगेश अहिरे, मक्तेदार आदित्य खटोड, नगरसेवक नवनाथ दारकुंडे यांच्यासह महापालिका व सार्वजनिक बांधकाम विभागाचे अधिकारी उपस्थित होते. जिल्हाधिकारी मित्तल हे रस्त्यांची पाहणी करीत असल्याची माहिती मिळताच शासकीय यंत्रणांची चांगलीच तारांबळ उडाल्याचेही दिसून आले. जिल्हा रुग्णालयासमोरील रस्तेकामाच्या कार्यादेशाविषयी जिल्हाधिकाऱ्यांनी माहिती घेतली.