धुळे : शहरातील ४० टक्के पथदिवे बंद असून नवरात्री उत्सवापूर्वी विविध भागात पथदिवे लावावेत, अन्यथा आंदोलन करण्यात येईल, असा इशारा ठाकरे गटाने दिला आहे. याबाबत महापालिका आयुक्त अमिता दगडे पाटील यांना ठाकरे गटातर्फे निवेदन देण्यात आले आहे. शहरात एलईडी पथदिवे बसविण्याचा ठेका १५ ते १७ कोटीत देण्यात आला. या पथदिव्यांची देखभाल दुरुस्तीची जबाबदारी संबंधित ठेकेदाराची होती. असे असताना शहरातील ४० टक्के पथदिवे आजही बंद स्थितीत आहेत. सत्ताधारी भाजप आणि ठेकेदारामध्ये टक्केवारीचे संबंध आहेत का, असा प्रश्नही निवेदनात उपस्थित करण्यात आला आहे.
नवरात्री उत्सवात महिला रात्री, पहाटे मंदिरात दर्शनासाठी जातात. ठिकठिकाणी गरबा नृत्याचे कार्यक्रम असतात. अशावेळी रात्रीच्या अंधारामुळे छेड काढण्याचे प्रकार घडू शकतात. त्यामुळे शहराचे चार भागात विभाजन करून प्रत्येकी दहा कर्मचार्यांचे स्वतंत्र पथक तयार करावेत. शहरातील प्रत्येक भागात तसेच प्रत्येक खांबांवर पथदिवे लावण्यात यावे. मनपाने केलेला सर्व खर्च हा संबंधित ठेकेदाराकडून वसूल करावा, अशा मागण्या विधानसभा संघटक ललित माळी, जिल्हाप्रमुख अतुल सोनवणे, उपजिल्हाप्रमुख किरण जोंधळे, महानगर प्रमुख धीरज पाटील आदींनी केल्या आहेत.
