कॅफे छापा प्रकरणात मूलभूत अधिकारांचे उल्लंघन; विद्यार्थी संघटनेची तक्रार

एआयएसएफच्या राज्य सहसचिव प्राजक्ता कापडणे, शहर सचिव अंकित यादव, सदस्या तल्हा शेख, कैवल्य चंद्रात्रे आदींनी पोलीस आयुक्त संदीप कर्णिक यांची भेट घेऊन निवेदन दिले. गंगापूर रस्त्यावरील एका कॅफेत घडलेल्या घटनेमुळे युवकांमध्ये नाराजी आणि भीतीचे वातावरण आहे. युवक-युवती कॅफेमध्ये एकमेकांच्या सहमतीने बसले होते. तरीही त्यांच्यावर अनावश्यक कारवाई करण्यात आली, त्यांचा व्यक्तिगत हक्क आणि गोपनीयतेचा भंग झाला. भारतीय संविधानाने प्रत्येकाला खासगी आयुष्य जगण्याचा अधिकार दिला आहे. जर दोन व्यक्ती परस्पर सहमतीने कोणत्याही ठिकाणी वेळ घालवत असतील, तर त्यावर हस्तक्षेप करणे चुकीचे आहे, अशी भूमिका संघटनेने मांडली आहे. यावेळी राहुल भुजबळ, हर्षाली अढांगळे, नंदिनी वाघमारे यांसह इतरही कार्यकर्ते उपस्थित होते.

आमदारांनी गुन्हेगारीविरुध्द आवाज उठवावा

लोकप्रतिनिधी म्हणून आमदारांनी शिक्षण, रोजगार, आरोग्य, वाहतूक यांसारख्या गंभीर विषयांवर लक्ष केंद्रित करणे अपेक्षित आहे. शहरात अंमली पदार्थांचा व्यवसाय फोफावत आहे, दिवसाढवळ्या हत्या, बलात्कार होत असून गुन्हेगारी वाढत आहे. परंतु हे सगळे विषय सोडून आमदार प्रसिद्धी स्टंट करण्यात व्यस्त असल्याचा आरोप एआयएसएफच्या पदाधिकाऱ्यांनी केला.