“नितू, निलू आगाऊ लेकरं,” सुषमा अंधारेंचा खोचक टोला; म्हणाल्या, “नारायण राणेंनी संस्कार…”

सुषमा अंधारे नाशिकमध्ये प्रसारमाध्यमांशी बोलत होत्या. “नितू आणि निलू ही प्रचंड आगाऊ लेकरं आहेत. त्यांचा अभ्यास कमी आहे, कारण नारायण राणेंनी त्यांना संस्कार दिले नाहीत. नितेश राणेंनी ट्विट केलेला व्हिडीओ २० वर्षापूर्वीचा आहे. कणकवलीत जाऊन होमवर्क घेतल्याने त्यांची कानशिल लाल झाली आहे. त्यामुळे त्याचं अस्थिर होणं स्वाभाविक आहे,” असा टोला सुषमा अंधारेंनी लगावला.

हेही वाचा : “त्यांची मानसिकता ढळली आहे, नैराश्यातून…”, एकनाथ शिंदेंचा उद्धव ठाकरेंना खोचक टोला; ‘कंटेनरभरून खोक्यां’चा केला उल्लेख!

सुषमा अंधारेंनी उपमुख्यमंत्री देवेंद्र फडणवीस यांच्यावरही टीका केली. “गृहमंत्री म्हणून देवेंद्र फडणवीस कुचकामी ठरल्याचं वारंवार सिद्ध होत आहे. फडणवीसांना विसर पडतो की ते राज्याचे गृहमंत्री आहेत. मात्र, ते एका पक्षाचे पदाधिकार आणि गृहमंत्री असल्यासारखे वागतात,” असे टीकास्त्र सुषमा अंधारेंनी फडणवीसांवर सोडलं आहे.

हेही वाचा : “मी कुठेतरी वाचलंय, रेडा हे…”, उदय सामंत यांचा उद्धव ठाकरेंना टोला; म्हणाले, “पाच महिन्यांपूर्वी आम्ही वाघ होतो!”

“देवेंद्र फडणवीस आणि शिंदे गटातील काही लोक स्वातंत्र्यवीर यांच्या मुद्द्यावरून अत्यंत आक्रमक होतात. तीच लोक छत्रपती शिवाजी महाराज यांच्याबद्दल तलवारी म्यान करून चकार शब्द काढत नाहीत. त्यामुळे भगतसिंह कोश्यारी हे राज्यपाल आहे की भाजपाचे पूर्णवेळ कार्यकर्ते, याचं उत्तर दिलं पाहिजे. कारण भगतसिंह कोश्यारी ठरवून बदनामी करतात,” असा आरोपही सुषमा अंधारेंनी केला आहे.