नाशिक : सीबीएस चौकातील डावी बाजू अखेर वाहनांसाठी खुली

शहराच्या मध्यवर्ती सीबीएस चौकात सिग्नल व्यवस्था आहे. या ठिकाणी वाहनांना डाव्या बाजूस जाण्यासाठी पूर्वी रस्ता मोकळा होता. परंतु, चार वर्षापूर्वी शासनाच्या स्मार्ट सिटी योजनेतंर्गत या चौकात स्मार्ट सिटी विभागाने केलेल्या कामात वाहनांना डाव्या बाजूस वळण्यास पूर्वीप्रमाणे जागा सोडण्यात आली नव्हती. त्यामुळे वाहतुकीस अडथळा निर्माण होत होता. वाहनचालकांना डाव्या बाजूला पूर्वी सहज वळण घेता येत होते. परंतु, स्मार्ट रस्त्याच्या कामामुळे सिग्नल सुटल्यानंतर पुढे जाऊन वळण घेणे भाग पडू लागले.

हेही वाचा >>> शिरपूर तालुक्यात इतर पिकांमध्ये गांजा शेती; एक कोटीपेक्षा अधिकचा माल जप्त

साहजिकच संपूर्ण वाहतूक ठप्प होते. वाहनांना डाव्या बाजूस जाण्यासाठी अडथळा निर्माण होत होता. बुधवारी डाव्या बाजूकडील रस्त्यावर असलेले पेव्हरब्लॉक काढून टाकण्याचे काम सुरू करण्यात आले. यामुळे वाहतूक कोंडीचा, प्रदूषणाचा व वेळेचा खोळंबा थांबणार आहे. डावीकडील बाजू मोकळी झाल्यामुळे वाहतूक कोंडीही कमी होण्यास मदत होणार आहे. याविषयी पर्यावरणप्रेमी निशिकांत पगारे यांनी माहिती देताना दोन वर्षापासून सातत्याने पाठपुरावा केल्यानंतर स्मार्ट सिटी विभागाने सीबीएस येथे केलेले बांधकाम काढून टाकण्यास सुरुवात केल्याचे सांगितले.