नाशिक: दारू पिऊन शिवीगाळ आणि मारहाण करणाऱ्या पतीच्या नेहमीच्या त्रासाला वैतागून पत्नी आणि मुलाने नायलॉनच्या दोरीने गळा आवळून खून केला. नांदगाव तालुक्यातील न्यायडोंगरी येथे ही घटना घडली.
न्यायडोंगरी येथे संजय गायकवाड हा कुटुंबासह वास्तव्यास होता. संजय यास दारुचे व्यसन होते. दारु पिऊन तो पत्नी उषा आणि मुलगा अविनाश यास नेहमी मारहाण करत असे. नेहमीप्रमाणे रात्री संजय दारू पिऊन घरी आला. भांडण झाल्यानंतर त्याने पत्नीला बेदम मारहाण सुरू केली. दररोजचा त्रास सहन न होऊन पत्नीने संजयच्या डोळ्यात मिरचीची पूड टाकली. मुलगा अविनाशही मदतीला आला. दोघांनी नायलॉनच्या दोरीने गळा आवळत संजयचा खून केला. या घटनेवेळी संजयची आई मीराबाई राठोडही उपस्थित होती.
हेही वाचा… जळगाव: फैजपूरनजीक लाकडासह साडेतीन लाखांचा मुद्देमाल जप्त; चालकाविरुद्ध गुन्हा दाखल
घटनेची माहिती मिळताच पोलीस निरीक्षक प्रीतम चौधरी, उपनिरीक्षक मनोज वाघमारे यांसह पथकाने घटनास्थळी भेट देत संशयित पत्नी उषा आणि मुलगा अविनाश यांना ताब्यात घेतले. संजयची आई मीराबाई राठोड यांनी दिलेल्या तक्रारीवरुन नांदगाव पोलिसात गुन्हा दाखल करण्यात आला आहे.