नाशिक : यशवंतराव चव्हाण महाराष्ट्र मुक्त विद्यापीठात अक्षता कलश पूजनावरून उद्भवलेल्या वादाच्या पार्श्वभूमीवर, या कार्यक्रमासंबंधी परिपत्रक काढणारे प्रभारी कुलसचिव भटूप्रसाद पाटील यांची अखेर उचलबांगडी करण्यात आली आहे. कुलगुरू प्रा. संजीव सोनवणे यांनी त्या घटनेचा या निर्णयाशी कुठलाही संबंध नसल्याचा दावा केला आहे.
यशवंतराव चव्हाण महाराष्ट्र मुक्त विद्यापीठाच्या नियमावलीचे उल्लंघन करून प्रशासनाने विद्यापीठाच्या आवारात शनिवारी अयोध्येतून आलेल्या अक्षता कलश पूजनास परवानगी दिल्याने वाद उद्भवला होता. या कार्यक्रमाची माहिती शुक्रवारी रात्री उशिरा कुलसचिव भटूप्रसाद पाटील यांनी परिपत्रकाद्वारे देत सर्व शिक्षक, अधिकारी आणि कर्मचाऱ्यांसह विद्यार्थ्यांनी उपस्थित राहण्याची सूचना केली होती. या कार्यक्रमास वंचित बहुजन आघाडीसह काही संघटनांनी आक्षेप घेत विरोध केल्यामुळे कुलगुरु प्रा. सोनवणे हे कार्यालयात असूनही पूजनास आले नव्हते. नंतर कार्यक्रमास उपस्थित राहणे ऐच्छिक होते, बंधनकारक नव्हते, असा बचाव विद्यापीठाने केला होता. कुलगुरुंनी विद्यापीठ कायद्याप्रमाणे कृती करणे अपेक्षित असताना त्यांना विद्यापीठाच्या उद्दीष्टांची जाण नसणे ही शोकांतिका असल्याची प्रतिक्रिया शैक्षणिक वर्तुळातून उमटली होती. याविषयाकडे लोकसत्तानेही लक्ष वेधले होते. या घटनाक्रमाच्या पार्श्वभूमीवर विद्यापीठातील उचलबांगडीकडे पाहिले जात आहे.
हेही वाचा… जळगाव जिल्ह्यात लाकूड तस्करी
मुक्त विद्यापीठात परीक्षा नियंत्रक असणाऱ्या पाटील यांच्याकडे वर्षभरापासून कुलसचिवपदाचा अतिरिक्त कार्यभार होता. १५ जानेवारी रोजी कुलसचिव पदासाठी मुलाखत होणार असताना कुलगुरुंनी उपरोक्त वादाची स्वत: कुठलीही जबाबदारी न घेता त्यांच्यावर एकतर्फी कारवाई केल्याची चर्चा आहे.
या संदर्भात कुलगुरू संजीव सोनवणे यांनी उपरोक्त घटनेशी या बदलाचा कुठलाही संबंध नसल्याचा दावा केला. काही दिवसात विद्यापीठाच्या परीक्षा सुरू होत असून कुलसचिव पदाच्या जबाबदारीतून मुक्त करण्याची विनंती पाटील यांनी पत्राद्वारे केली होती. पुढील काही दिवस ते ही जबाबदारी स्वीकारण्यास तयार नव्हते. त्यामुळे प्रभारी कुलसचिव पदाची जबाबदारी विद्यार्थी सेवा विभागाचे प्रभारी संचालक डॉ. प्रकाश देशमुख यांच्याकडे सोपविण्यात आल्याचे त्यांनी सांगितले.
