धुळे – नाशिक जिल्ह्यातील मालेगाव, सटाणा आणि धुळे जिल्ह्यातील साक्री तालुक्यातून दुचाकी चोरी करणाऱ्या दोन चोरांना पिंपळनेर पोलिसांनी ताब्यात घेतले. त्यांच्याकडून सहा लाख रुपये किंमतीच्या २० दुचाकी हस्तगत करण्यात आल्या आहेत. या कामगिरीबद्दल धुळ्याचे पोलीस अधीक्षक संजय बारकुंड यांनी पिंपळनेर पोलिसांचा प्रशस्तीपत्रक आणि १० हजार रुपये देऊन गौरव केला आहे.
नाशिक, मालेगाव, सटाणा या भागासह धुळे जिल्ह्यातील साक्री तालुक्यातून दुचाकी चोरी करुन त्यांची विक्री करणाऱ्या एका चोराची माहिती पिंपळनेर पोलीस ठाण्याचे हवालदार राकेश बोरसे यांना मिळाल्यावर त्यांनी सहायक निरीक्षक श्रीकृष्ण पारधी यांना त्याबद्दल सांगितले. त्यानुसार पारधी यांनी चोराच्या तपासासाठी पथक तयार केले. पथकाने शामील बागूल (२१, रा.शेंदवड, ता.साक्री) याला ताब्यात घेतले. त्याच्याकडे दुचाकी चोरीविषयी चौकशी केली असता त्याने त्याचा साथीदार रोशन गायकवाड (२३, रा. विरगाव, ता.बागलाण) याच्यासह नाशिक जिल्ह्यासह मालेगाव, साक्री तालुक्यातून दुचाकींची चोरी केल्याची कबुली दिली. यानंतर पोलिसांनी गायकवाडलाही ताब्यात घेतले. या दोघांनी देशशिरवाडे, बोपखेल, मालेगाव कॅम्प, छावणी, वडनेर, खाकुर्डी, सटाणा या ठिकाणांहून २० दुचाकी चोरल्याचे सांगितले. पोलिसांनी या दोघांकडून सहा लाख २५ हजार रुपयांच्या २० दुचाकी हस्तगत केल्याची माहिती अधीक्षक बारकुंड यांनी दिली.
