नवी मुंबई : आज संध्याकाळी सव्वापाचच्या सुमारास तुर्भे एमआयडीसीतील एका कापड कारखान्याला भीषण आग लागली असून, आत काही कामगार अडकल्याची भीती व्यक्त केली जात आहे. आगीचे कारण अद्याप स्पष्ट झालेले नाही. कापड कारखाना असल्याने काही क्षणात पूर्ण कारखान्यात आग पसरली असून, पूर्ण परिसरात धूर झाला आहे.
हेही वाचा – नवी मुंबई : उद्यानात आढळला अज्ञात महिलेचा मृतदेह
आकाशात उडणारे धुराचे लोट हे सुमारे तीन ते चार किलोमीटर दूर असलेल्या सायन पनवेल महामार्गावरून दिसत होते, अशी माहिती प्रत्यक्षदर्शी विलास घोरपडे यांनी दिली. आग विझवण्यासाठी वाशी, नेरूळ, सीबीडी, तसेच एमआयडीसीतील अग्निशमन यंत्रणा कामाला लागली आहे. रेडीमेड कापडे बनवणाऱ्या कंपनीच्या कारखान्याला आग लागली असून, तुर्भे एमआयडीसीतील डी ८४ भूखंडावर हा कारखाना आहे. आगीच्या ठिकाणी आम्ही नुकतेच पोहोचलो असून, अद्याप आत कोणी आहे किंवा नाही, आदी माहिती आमच्यापर्यंत पोहोचलेली नाही, अशी माहिती वाशी अग्निशमन विभागाने दिली आहे.
