नवी मुंबई : ऐरोली सेक्टर सहा येथे एका इलेक्ट्रॉनिक्स दुकानाचे शटर उचकटून एका चोरट्याने आत प्रवेश केला मात्र या बाबत पोलिसांना माहिती मिळताच तेही तातडीने घटनास्थळी पोहचले व चोराला रंगेहात पकडले.ऐरोली सेक्टर ६ येथे निखिल जैन यांचे यश नावाचे इलेक्ट्रॉनिक्सचे दुकान आहे. सकाळी दुकान उघडण्यापूर्वी माल वाहतूक करणारा टेम्पो चालक आणि अन्य कर्मचारी आले होते. त्यांना दुकानाचे शटर उचकटल्याचे आढळून येताच त्यांनी पाहणी केली त्यावेळी आत मध्ये एक अनोळखी व्यक्ती असल्याचे आढळून आले.
त्यांनी तात्काळ पोलीस आणि जैन यांना फोन करून हि माहिती दिली. जैन येण्यापूर्वीच पोलिसांनी आत असलेल्या व्यक्तीला ताब्यात घेतले होते. त्याची चौकशी केली असता फिरोज अहमद शेख असे त्याचे नाव असल्याचे समोर आले. तो मुंबईत मोहम्मद अली रस्त्याशेजारील झोपडपट्टीत राहणारा असून हमाली करतो असेही समोर आले. त्याने सदर दुकानाचे शटर उचकटून आतील ५० हजाराची चोरलेली रोकड जप्त करण्यात आली आहे.
