लोकसत्ता प्रतिनिधी
नवी मुंबई : नवी मुंबई पोलीस आयुक्तालय क्षेत्रात वाहतूक शाखेने विशेष मोहीम राबवली. यात ‘नो पार्किंग’ असतानाही त्या ठिकाणी वाहने उभ्या करणाऱ्या आणि वाहतुकीस अडथळा निर्माण करणाऱ्या तीन हजार २९७ वाहनांवर दंडात्मक कारवाई करण्यात आली आहे.
नवी मुंबई हे १०० टक्के साक्षरता असलेले शहर असले तरी या साक्षर शहरात बेशिस्त पार्किंग मोठ्या प्रमाणात केले जाते. त्यात गर्दीच्या ठिकाणी अशा पार्किंगमुळे वाहतूक कोंडी मोठ्या प्रमाणात होत असते. यात सीबीडी सेक्टर १५, वाशी सेक्टर ९/१० , १५/१६, सतरा प्लाझा परिसर , एपीएमसी परिसर, पाम बीच नेरुळ सिग्नल जवळ असणारे शॉपिंग कॉम्प्लेक्स, ऐरोलीतील दिवा नाका, सेक्टर ३ ते ५, कोपरखैरणेतील रा. फ नाईक चौक ते एमएसइबी सेक्टर २ व १९ बस थांबा परिसर यांचा समावेश आहे. याशिवाय जवळपास सर्व रेल्वे स्थानकांच्या परिसरात बेशिस्त पार्किंग मोठ्या प्रमाणावर होत असते. त्यात सीबीडी आणि वाशी सेक्टर ९/१० आणि १५/१६ या मार्केट परिसरापासून पाच मिनिटांच्या अंतरावर सेक्टर १६ येथील नाल्यावर पार्किंग सोय असूनही वाहनचालक मार्केटमध्येच वाहने बेशिस्तीने उभी करतात.
अनेक ठिकाणी तिहेरी पार्किंग केली जाते. अशा वेळी वाहनचालक वाहनात बसून मोबाइलवर बोलत असतात. मात्र आपल्या वाहनामुळे वाहतूक कोंडी होत आहे याचे काहीही देणेघेणे नाही असा त्यांचा आविर्भाव दिसतो. विशेष म्हणजे वाहतूक पोलिसाने हटकले तरी चालक वाहनात असताना दंड कसा करतात म्हणून हुज्जत घातली जाते असा अनुभव एका वाहतूक पोलीस कर्मचाऱ्याने ‘लोकसत्ता’कडे कथन केला. अशीच परिस्थिती उरण शहर, उरण जेएनपीटी व जेएनपीटी किल्ले गावठाण मार्गालगत अंतर्गत भागात, पनवेल बस स्थानक परिसर, शहरांतर्गत रस्ते, कच्छी मुहल्ला, कळंबोली सर्कल नजीकचा परिसर या ठिकाणीही आहे. ही सर्व परिस्थिती पाहता नवी मुंबई पोलीस आयुक्तालयाच्या परिसरात वाहतूक पोलिसांनी बेशिस्त पार्किंग करणाऱ्यांच्या विरोधात विशेष मोहीम सुरू केली आहे.
या मोहिमेअंतर्गत, वाहतुकीस अडथळा निर्माण करणारे आणि नो-पार्किंगमध्ये उभे असलेले वाहनांवर कारवाई करण्यात आली. गुरुवारपासून या मोहिमेला सुरुवात करण्यात आली आहे. पहिल्याच दिवशी या मोहिमेदरम्यान गुरुवारी आणि शुक्रवारी मिळून नवी मुंबई पोलीस आयुक्तालयातील वाहतूक विभागाने वाहतुकीस अडथळा निर्माण करणारे ३ हजार २९७ वाहनावर कारवाई करण्यात आली आहे. यात गुरुवारी केलेल्या कारवाईत १ हजार ८४९ तर शुक्रवारी १ हजार ४४८ बेशिस्त वाहनांवर कारवाई करण्यात आली आहे.
गुरुवार आणि शुक्रवारी केलेल्या कारवाईत सर्वाधिक कारवाई कळंबोली येथे ४२७ तर सर्वात कमी गव्हाण फाटा येथे ५४ वाहनांवर कारवाई करण्यात आली आहे. वाशी- १४९, एपीएमसी – २०६, रबाळे, १५३ महापे – १७३, कोपरखैरणे – ३०५, तुर्भे ३९५, सी वुड्स १५०, सीबीडी – १६२, खारघर- १८६, कळंबोली- ४२७ , तळोजा- ७३, पनवेल शहर- २६५, नवीन पनवेल- ६८, उरण – ४०९, न्हावाशेवा- १३८, गव्हाणफाटा ५४ एकूण ३ हजार २९७ .
शहरात बेशिस्त वाहन चालवणे आणि बेशिस्त पार्किंगमुळे सर्वाधिक वाहतूक कोंडी होते. त्यामुळे कुठलीही पूर्व सूचना न देता ही कारवाई अचानक करण्यात आली होती. येत्या काही दिवस अशीच कारवाई करण्यात येणार आहे. तसेच यात सातत्य राखण्यात येणार आहे. वाहन चालकांनी कृपया वाहतूक नियमांचे पालन करावे. -तिरुपती काकडे, पोलीस उपायुक्त, वाहतूक शाखा, नवी मुंबई
