मुख्यमंत्र्यांना पनवेलमधील शेतकऱ्यांचे प्रश्न जाणून घ्यायचे नसल्यास आम्हाला निर्णायक लढा देण्याची वेळ आली; माजी आ. बाळाराम पाटील

नैना हटाव शेतकरी बचाव असा नारा देऊन शेतकरी कामगार पक्ष, क काँग्रेस, राष्ट्रवादी काँग्रेस पक्ष (शरद पवार गट), शिवसेना (ठाकरे गट) यांनी एकत्र येऊन आंदोलन छेडले. पनवेल महापालिकेच्या मालमत्ता कर पाच वर्षांचा रद्द करावा या दूस-या मागणीसाठी शहरातील व ग्रामीण भागातील मालमत्ता धारकांनी आंदोलनात सहभाग घेतला. परंतू या दोनही आंदोलनातून महाविकास आघाडीच्या घटक पक्षांना काहीच हाती लागले नाही. पनवेलची महाविकास आघाडी ही फक्त आंदोलनापुरती असल्याची चर्चा होत आहे. पनवेल प्रकल्पग्रस्त समितीने बुधवारी मालमत्ता करासाठी आयोजित केलेल्या धरणे आंदोलनात महिलांचा सहभाग मोठा दिसला. मात्र या धरणे आंदोलनातून कोणताही ठोस दिलासा आंदोलकांना मिळालेला नाही. त्यामुळे संतापलेल्या प्रकल्पग्रस्त आणि सिडको वसाहतींमधील मालमत्ता धारकांना घेऊन महाविकास आघाडी आक्रमक आंदोलन लवकरच करण्याच्या तयारीला लागले आहे.

हेही वाचा >>>नवी मुंबई: दोन उड्डाणपुलांची कामे सुरू; वाहतूक कोंडी होऊ नये म्हणून उपाययोजना

ज्या शेतक-यांचे सर्वात मोठे योगदान या देशाच्या व राज्याच्या विकासासाठी आहे. ते शेतकरी स्वताच्या न्याय हक्कासाठी रस्त्यावर आलीत त्यामंडळींना भेटायचेच नाही. असा सरकारचा निर्णय असल्यास तो दुदैवी आहे. त्यामुळे यापुढील आंदोलन आक्रमक असेल. निर्णायक स्थितीसाठी आंदोलन करण्याची वेळ सरकारने आम्हा शेतक-यांवर आणली आहे. गावागावांमध्ये यासाठी बैठका सूरु झाल्या आहेत. लवकरच महाविकास आघाडीतील आम्ही घटकपक्षांचे नेते एकत्र येऊन याबाबतचे नियोजन करुन याबाबतची माहिती प्रसारमाध्यमांना कळवू. वेळोवेळी शासनाकडून आंदोलकांची झालेल्या दिशाभूलमुळे आक्रमक पवित्रा आम्हाला घ्यावा लागणार आहे. प्रत्येक आंदोलनाला पालकमंत्री, मुख्यमंत्री यांच्या भेटी घडवू असे आश्वासन दिले जाते. मात्र आजपर्यंत एकदाही त्यावर अंमलबजावणी झाली नाही. यासारखी दुदैवीबाब नाही.  – बाळाराम पाटील, माजी आ. शेकाप