कर्नाळा किल्ल्यावर पर्यटकाचा मृत्यू

शनिवारी सकाळी सुट्टी असल्याने शेकडो पर्यटक कर्नाळा किल्यावर आले होते. यामध्ये मुंबई येथील व्हीजेटीआय महाविद्यालयाचे विद्यार्थ्यांचा मोठा समुह होता. त्याचसोबत काही पालक आपल्या मुलांना कर्नाळा किल्यावर पर्यटनासाठी घेऊन आले होते. ४० ते ५० पर्यटकांचा गोंधळ झाल्यामुळे मधमाशा भडकल्याने त्यांनी अनेकांना दंश केले. या घटनेची माहिती पनवेल तालुका पोलीस ठाण्याचे वरिष्ठ पोलीस निरीक्षक गजानन घाडगे यांना समजल्यावर त्यांनी तातडीने पोलीस उपनिरीक्षक विष्णू टोने यांच्यासह तेथे पोलीस पथक रवाना केले. या दरम्यान जखमींनी रुग्णवाहिकेसाठी १०८ वर संपर्क साधल्याने जखमींना वेळीच मदत मिळाल्याचे प्रत्यक्षदर्शींनी सांगीतले.

जखमींना पनवेल येथील नानासाहेब धर्माधिकारी उपजिल्हा रुग्णालयात उपचारासाठी दाखल करण्यात आले होते. तर काही जखमींना पोलीसांनी स्वता उपचारासाठी दाखल केले. पर्यटकांमध्ये जी धावपळ उडाली त्यापैकी एक संदीप पुरोहित हे आहेत. ४४ वर्षीय संदीप हे नवी मुंबईतील कोपरखैरणे येथे राहतात. शनिवारी ते कुटुंबासोबत येथे आले होते. संदीप यांच्या डोळ्याला मधमाशांनी दंश केल्यानंतर सैरावैरा धावणारे संदीप याच गोंधळात तेथे पडले. दगड डोक्याला लागल्याने रक्तस्त्राव मोठ्या प्रमाणात झाल्याने त्यांना उपचार मिळण्यापूर्वीच त्यांचा मृत्यू झाल्याची माहिती रुग्णालयातील डाॅक्टरांनी दिली. या घटनेनंतर जखमींची संख्या उपजिल्हा रुग्णालयात वाढल्याने पनवेल तालुका पोलिस ठाण्याचे वरिष्ठ पोलीस निरीक्षक घाडगे हे रुग्णालयातील स्थितीवर डाॅक्टरांसह लक्ष ठेऊन आहेत.