पंचतारांकित हॉटेलांसाठी भूखंडांचा शोध सुरू; सिडकोला अब्जावधींच्या उत्पन्नाची आस
प्रस्तावित आंतरराष्ट्रीय विमानतळाच्या पायाभरणीपूर्वीच सिडको प्रशासनाने पंचतारांकित हॉटेलांच्या उभारणीसाठी भूखंडांची चाचपणी सुरू केली आहे. त्यासाठी सिडकोचे व्यवस्थापकीय संचालक भूषण गगराणी यांनी स्वत पुष्पकनगर, खांदेश्वर रेल्वे स्थानकासमोर आणि कळंबोली सर्कल येथे भूखंड पाहण्यास सुरुवात केली आहे. येत्या चार महिन्यांत या भूखंडांची निविदाप्रक्रिया पूर्ण करून ते विकण्यासाठी सिडकोने प्रयत्न सुरू केले आहेत. हॉटेल उद्योगातील आंतरराष्ट्रीय दर्जाच्या बडय़ा कंपन्यांनी यामध्ये भाग घ्यावा म्हणून प्रयत्न करण्यात येणार आहेत. त्यातून सिडकोच्या तिजोरीत अब्जावधी रुपये जमा होणार असून त्यामुळे कळंबोली, पुष्पकनगर व कामोठेमध्ये जागांचा भाव वधारण्याची शक्यता आहे.
खारघर येथील एका निवासी व व्यापारी संकुलाच्या भूखंडाचा भाव सिडकोच्या निविदा प्रक्रियेनंतर प्रति चौरस मीटरला ८५ हजार रुपये झाल्याची चर्चा होती. एवढी मोठी रक्कम मोजून बांधकाम व्यावसायिकांनी ही भूखंडखरेदी केल्याने सिडकोच्या जमिनीने गगनचुंबी दर गाठल्याची चर्चा होती. नोटाबंदीनंतर सिडको क्षेत्रातील बांधकाम व्यावसायिकांमध्ये मंदीचे सावट असले तरी, कोणत्याही गुंतवणूकदाराने अथवा विकासकाने आपले दर अद्याप नीचांकीच्या आलेखात नेलेले नाहीत. सिडको प्रशासनाने याच दरांवर आपली तिजोरी भरण्याचा इरादा कायम ठेवल्याचे दिसते.
प्रस्तावित आंतरराष्ट्रीय विमानतळाच्या उभारणीपूर्वी विमानतळापासून १५-२० मिनिटांच्या अंतरावरील तीन भूखंड पंचतारांकित हॉटेलांसाठी राखून ठेवण्यात आले आहेत. शीव-पनवेल महामार्गालगत कळंबोली सर्कल येथे वाहतूक पोलीस चौकीच्या मागील बाजूस असणाऱ्या १६ हजार चौरस मीटर, खांदेश्वर रेल्वेस्थानकाच्या समोरील सेक्टर २५ येथील भूखंड क्रमांक ३० ते ३३ यावरील १२ हजार चौरस मीटर, तसेच पुष्पकनगर येथील सेक्टर ५ मधील भूखंड क्रमांक १ वरील दहा हजार चौरस मीटर असे हे तीन भूखंड आहेत. यापैकी कळंबोली सर्कल येथील भूखंडावर मोठय़ा प्रमाणात अतिक्रमण झाले आहे. हे अतिक्रमण हटवणे ही सिडको प्रशासनासाठी डोकेदुखी ठरणार आहे. सुमारे १ लाख प्रति चौरस मीटरप्रमाणे सिडको प्रशासन या हॉटेलसाठीचे राखीव भूखंड विकेल, असा अंदाज वर्तवण्यात येत आहे.
सिडकोने आंतरराष्ट्रीय प्रवाशांच्या सोयीचा विचार करून पंचतारांकित हॉटेलांसाठी भूखंडांचे नियोजन सुरू केले आहे. विमानतळापासून काही अंतरावर सर्व सुखसोयींनी युक्त अशी अद्ययावत हॉटेल उभारण्यात यावीत, म्हणून सिडको प्रयत्नशील आहे. सध्या पनवेल परिसरात अशा बडय़ा पंचतारांकित हॉटेलांची कमतरता आहे. विमानतळाचे काम पूर्ण होण्यासाठी जो वेळ लागेल, त्या दरम्यान पंचतारांकित हॉटेल तयार व्हावीत आणि विमानतळ सुरू होताच प्रवाशांसाठी ही सोय उपलब्ध व्हावी म्हणून सिडकोने पुढाकार घेतला आहे. व्यवस्थापकीय संचालक भूषण गगराणी यांनी या भूखंडांची पाहणी केली असून या भूखंडांची निविदा प्रक्रिया पार पाडण्याचे आदेशही त्यांनी मार्केटिंग विभागाला दिले आहेत. हॉटेलांसाठी देण्यात येणाऱ्या भूखंडांच्या भाडेपट्टय़ातून मिळणाऱ्या महसुलाचा लाभ सिडको क्षेत्रातील नागरिकांना पायाभूत सुविधा पुरवण्यासाठी होणार आहे.
– डॉ. मोहन निनावे, मुख्य जनसंपर्क अधिकारी, सिडको
