नवी मुंबई : ‘ठाण्यात यापुढे फक्त कमळ’ अशी घोषणा करत उपमुख्यमंत्री एकनाथ शिंदे यांना त्यांच्या घरात जाऊन आवाज देणारे राज्याचे वनमंत्री गणेश नाईक यांना त्यांच्या नवी मुंबईतील बालेकिल्ल्यात आव्हान उभे करण्याची रणनिती शिंदे यांच्या शिवसेनेने आखली असून विधानसभा निवडणुकांच्या तोंडावर शिंदे यांच्या संतापाचे कारण ठरलेले पक्षाचे उपनेते विजय नाहटा यांना बुधवारी पक्षात पुन्हा सक्रिय करत ‘मिशन टायगर’चा पहिला टप्पा शिंदे यांच्या शिवसेनेने पूर्ण केल्याचे विश्वसनीय वृत्त आहे.
बेलापूर विधानसभा मतदारसंघात भाजपच्या उमेदवार मंदा म्हात्रे यांच्याविरोधात बंडखोरी करत विजय नाहटा यांनी एकनाथ शिंदे यांचा संताप ओढवून घेतला होता. म्हात्रे यांच्याविरोधात गणेश नाईक यांचे माजी आमदार पुत्र संदीप रिंगणात होते. कोणत्याही परिस्थितीत संदीप यांचा पराभव झाला पाहिजे यासाठी शिंदे उत्सुक होते. मात्र नाहटांच्या बंडखोरीमुळे ते दुखावले गेले. म्हात्रे यांच्यासाठी निवडणुकीत शिंदे यांच्या शिवसेना पक्षाचे कार्यकर्ते शेवटच्या टप्प्यापर्यंत सक्रिय होत नव्हते. वाशीतील शिंदे यांचे कडवे समर्थक आणि पक्षाचे विद्यमान जिल्हाप्रमुख किशोर पाटकर यांच्यामार्फत शिंदे यांनी आपल्या पक्षाचे कार्यकर्ते अखेरच्या टप्प्यात म्हात्रे यांच्यासाठी रिंगणात उतरविले.
खासदार नरेश म्हस्के यांना यासाठी विशेष जबाबदारी देण्यात आली. इतक सगळे करुनही नाहटा यांच्यामागे शिंदेसेनेतील बरेच कार्यकर्ते सक्रिय होते. हे लक्षात येताच शेवटच्या दिवशी स्वत: शिंदे बेलापूरात आले आणि त्यांनी ‘नाहटा फाटा यांना घरचा रस्ता दाखवा’ असे वक्तव्य करत आपल्या पक्षाची रसद मंदा म्हात्रे यांच्या मागे उभी राहील अशी व्यवस्था केली. ज्या नाहटा यांचा उल्लेख शिंदे यांनी ‘फाटा’ असा केला त्यांना सत्ता येताच पुन्हा पक्षात घेतले जाईल का याविषयी गेल्या तीन महिन्यांपासून वेगवेगळे तर्कवितर्क लढविले जात होते. मात्र गणेश नाईक यांच्या आक्रमक राजकारणाला उत्तर म्हणून शिंदे यांनी बुधवारी नाहटा यांचा पक्षातील मार्ग सुकर केल्याची चर्चा आता रंगली असून जिल्हाप्रमुख किशोर पाटकर यांच्या समवेत शिंदे यांनी नहाटा यांची घेतलेली भेट शहरातील राजकीय वर्तुळात चर्चेचा विषय ठरली आहे.
मिशन टायगरची चर्चा जोरात
नाहटा यांना पक्षात पुन्हा सक्रिय करत असताना शिंदे यांनी नवी मुंबईतील आगामी महापालिका निवडणुकांच्या तयारीला जोमाने सुरुवात केल्याची चर्चा आहे. काही दिवसांपूर्वी ऐरोली विधानसभा मतदारसंघातील काँग्रेसचे प्रभावी नेते रमाकांत म्हात्रे यांना शिंदे यांनी पक्षात घेतले. हा पक्ष प्रवेश गणेश नाईक यांच्या ऐरोली विधानसभा मतदारसंघात कसा होईल याची आखणीही पद्धतशीरपणे करण्यात आली. म्हात्रे आणि त्यांचे चिरंजीव अनिकेत यांचा आगरी भूमिपुत्र समाजात प्रभाव आहे.
याच दरम्यान प्रकल्पग्रस्तांनी बांधलेल्या गरजेपोटी बांधलेल्या घरांचा प्रश्न शिंदे यांनी नगरविकास विभागामार्फत निकाली लावला. हे करत असताना उद्धव सेनेत असलेल्या काही माजी नगरसेवकांना पक्षात घेण्याची चाचपणीही शिंदे गटातून केली जात आहे. यापैकी काही नगरसेवक नाहटा यांचे निकटवर्तीय मानले जातात. उद्धव ठाकरे गट, काँग्रेस, राष्ट्रवादी शरद पवार गटातील प्रभावी माजी नगरसेवकांचा एक मोठा गट गळाला लावण्यासाठी पद्धतशीरपणे व्यूहरचना शिंदेसेनेत केली गेली असून काहीही झाले तरी नवी मुंबईत नाईकांना आव्हान उभे करायचे ही तयारी ठाण्याहून केली जात आहे.
एकनाथ शिंदे मुख्यमंत्री असताना नवी मुंबई महापालिका तसेच सिडकोतील कारभाराविषयी नाईक टिकेचा सूर लावताना दिसत आहेत. नाईकांच्या या टिकेला जशास तसे उत्तर द्या अशा स्पष्ट सूचना नाहटा यांना देण्यात आल्या असून जितके येतील तितके परपक्षीय पक्षात घ्या अशा तयारीनेच शिंदे गट कामाला लागल्याची चर्चा आहे.
मी पक्षापासून दूर गेलो नव्हतो तर रजेवर गेलो होतो. उपमुख्यमंत्री शिंदे यांनी कामाला लागण्याचे आदेश दिले आहेत. त्यानुसार नवी मुंबईत पक्षवाढीसाठी काम सुरू केले आहे. -विजय नाहटा, उपनेते
नाहटा यांच्या प्रवेशाने पक्षाला नक्कीच बळकटी येणार आहे. जनतेत अतिशय चांगली प्रतिमा असणारा नेता परत आल्याने शिवसेनेत उत्साह नक्कीच आहे. -किशोर पाटकर, जिल्हाप्रमुख शिवसेना (एकनाथ शिंदे)
