बाजारात सध्या वालाच्या शेंगा येऊ लागल्या असून खवय्यांना पोपटीची चाहूल लागली आहे. त्यामुळे यावर्षीच्या हंगामातील वालाच्या शेंगांच्या पोपट्याना सुरुवात झाली आहे. त्यामुळे काही ठिकाणी पोपट्यांना लागू लागल्या आहेत. थंडीची सुरुवात झाल्यानंतर पोपटाची ही आस लागलेली असते. मात्र वालाच्या शेंगांना उशीर होत असल्याने पोपटाची प्रतिक्षा असते. यावर्षी डिसेंबरच्या सुरुवातीलाच बाजारात वालाच्या शेंगा आल्या आहेत. त्याची खरेदीही सुरू झाली आहे. या शेंगांना किलोमागे १०० रुपये दर आकारला जात आहे. वालाच्या पोपट्या या उरण तालुक्यातील चिरनेर तसेच इतर अनेक भागातून लावल्या जातात.
हेही वाचा >>>नवी मुंबई: वाशी कोपरी सिग्नल…बनलाय चक्का जाम सिग्नल
वालाच्या शेंगांच्या पोपटीची लज्जत आणि चव ही सात समुद्रा पलीकडे पोहचली आहे. गवत आणि लाकडाच्या आगीवर वाफेवर शिजविलेल्या शेंगा तयार केल्या जातात. सुरुवातीला केवळ वालाच्या शेंगांच्या ऐवजी सध्या विविध प्रकारच्या शेंगा,वांगी,बटाटा, तसेच अंडी,चिकन ही या पोपटीत शिजविल्या जातात. तेला शिवाय वाफेवर शिजणाऱ्या जिन्नस चवीला उत्कृष्ट असतात.त्यामुळे पोपटी ही अनेक ठिकाणी प्रसिद्ध आहे. असे असले तरी ठराविक ठिकाणच्या पोपटीला खवय्यांकडून पसंती दिली जाते. त्यात उरण तालुक्यातील चिरनेर परिसराचा समावेश आहे.
हेही वाचा >>>उरण तालुक्यातील अंतर्गत रस्ते दुरुस्तीच्या प्रतीक्षेत
या पोपटीची खरी जिन्नस म्हणजे शेतात व बांधावर मिळणारा म्हामोट्याचा पाळा ही आहे. या पाल्याचा जखमेवर लावण्यासाठी उपयोग केला जातो.
पोपटी बनविण्याची पद्धत : एका मडक्यात बुंध्याला म्हामोटा(पाळा)त्यानंतर एक थर शेंगा व इतर जिन्नस यांना मीठ मसाला लावून त्यानंतर पुन्हा म्हामोटा असे थर लावले जातात. त्यानंतर शेवटी म्हामोट्याच्या पाळ्यानी मडक्याचे तोंड बंद केले जाते. मंडक उपड करून ठेवलं जात. त्यानंतर लाकडं व गवत रचून त्याला पेटवण्यात येत. ही आग आणि त्याची धग पाऊण तास ते एक तास कायम ठेवली जाते. या वाफेचा वास आल्यानंतर मंडक काढून ते रिकाम केलं जातं.आणि वाफाळेल्या शेंगांचा आस्वाद घेतात.
