पनवेल : Navi Mumbai Weather Forecast समुद्र सपाटीपासून तीन मीटर उंचीवर खांदेश्वर रेल्वेस्थानक उभारल्यानंतरही प्रवाशांना स्थानक गाठण्यासाठी पाय आणि पादत्राणे भिजवूनच स्थानकात जावे लागते. प्रत्येक पावसाळ्यात या समस्येला प्रवाशांना तोंड द्यावे लागत आहे. नियोजनबद्ध शहरांचे शिल्पकार अशी नवी मुंबईची ओळख आहे. मात्र रेल्वेस्थानकातून प्रवास केल्यावर सिडको महामंडळाचा हा दावा फोल ठरल्याचे चित्र सध्या खांदेश्वर स्थानकातून प्रवास करताना अनुभवायला मिळते.
पावसाळ्यात पाऊस कमी झाला कींवा जास्त तरी खांदेश्वर स्थानकातील भुयारी मार्गात पाणी साचते. या पाण्याविषयी प्रवासी आणि सामाजिक कार्यकर्त्यांनी तक्रार केल्यावर मोटार पंप या ठिकाणी लावून साचलेले पाणी उपसले जाते. मागील अनेक वर्षे पावसाळ्यात मोटारपंप लावणा-या कंत्राटदाराचा यामध्ये लाभ झाला असेल मात्र हजारो प्रवाशांना पाय भिजवूनच प्रवास करण्याची शिक्षा मिळाली आहे.
मागील अनेक वर्षे कामोठे येथील सीटीझन युनिटी फोरमच्या सचिव रंजना सडोलीकर हे दरवर्षी सिडको मंडळाकडे पाठपुरावा करुन येथी यंत्रणा कार्यान्वित करतात परंतू सडोलीकर यांनी दिलेल्या माहितीनूसार दरवर्षी हे पाणी साचणार माहित असूनही येथील स्थानक प्रबंधक, सिडकोचे अधिकारी पावसाळ्यापुर्वी याचे नियोजन का करत नाही असा प्रश्न उपस्थित होत आहे. याच स्थानकातून रोज प्रवास कऱणारे राज हांदे यांनी सध्या साचलेल्या पाण्याला वाटरपार्क अशी उपरोधिक टीका करुन हे छायाचित्र समाजमाध्यमांवर राज्याचे मुख्यमंत्री व संबंधित विभागांना पाठविले आहे.
