पनवेलमध्ये दैनंदिन करोना रुग्ण शंभरच्या घरात; २९६ रुग्ण उपचाराधीन, मुखपट्टीचा वापर करण्याचे आवाहन

पनवेल : पनवेल तालुक्यात करोना रुग्णांची संख्या वाढत असून उपचाराधीन रुग्णांची संख्या २९६ पार झाली आहे. असे असले तरी शहरात करोना नियमांचे पालन होताना दिसत नाही. गुरुवारी पनवेल तालुक्यात एकाच दिवशी ९९ करोनाग्रस्त आढळले. यामध्ये पालिका क्षेत्रात ८२ तर ग्रामीण भागात १७ रुग्ण होते. तसेच तालुक्यातील एकूण करोनावर उपचार घेणाऱ्यांची संख्या पालिका क्षेत्रात २४८ तर ग्रामीण भागात ४८ वर पोहचली आहे. तालुक्यात गुरुवारी २९६ करोनाग्रस्त उपचार घेत होते. यामध्ये घरून उपचार घेणाऱ्यांची संख्या मोठी आहे. गेल्या तेरा दिवसांत पालिका क्षेत्रात ३१३ तर ग्रामीण पनवेलमध्ये ८५ करोनाग्रस्त आढळले. तालुक्यात १३ दिवसात सुमारे चारशे रुग्ण वाढले आहेत.