विचित्र अपघातात रिक्षा थेट चढली झाडावर ; केबल्स वेटोळ्यांची करामत

नवी मुंबई : वाशी येथे एका मालवाहू रिक्षाचा विचित्र अपघात शनिवारी दुपारी चारच्या सुमारास झाला. सुदैवाने यात फारसे नुकसान झाले नाही मात्र या अपघाताने रस्त्यातील खांबांवर झाडांवर लोंबकणारे केबल्सचे वेटोळे किती धोकादायक होऊ शकतात हे समोर आले.नवी मुंबईतील रस्त्यावरील विजेचे खांबे आणि रस्त्यालगत असलेल्या झाडांवर विविध केबल्सचे वेटोळे दिसून येतात. राज्यातील क्रमांक एकचे व देशातील क्रमांक तीनचे स्वच्छ शहर म्हणून नावाजलेल्या नवी मुंबईत हे केबल्सचे बेंगरुळ दृश्य दिसते. वाशी कोपरी गावातून कोपरखैरणेच्या सीमेवर असणाऱ्या ब्ल्यू डायमंड चौकातुन वाशी कडे वळण घेऊन जात असताना अशाच वेटोळ्यात एका मालवाहू रिक्षातील फरशीच्या उभ्या ठेवलेल्या पट्ट्या अडकल्या व क्षणात रिक्षा थेट झाडावर चढली.