उरण: खोपटे-कोप्रोली मार्गावर खड्ड्यांचे विघ्न कायम, एकाच ठिकाणी खड्डे कसे? प्रवाशांचा सवाल; कोट्यवधी रुपये खर्च करूनही दुरवस्था

जेएनपीटी बंदरामुळे खोपटे परिसरात बंदरावर आधारित गोदाम उभारण्यात आले आहेत. त्यामुळे या मार्गावरून दररोज हजारो अवजड कंटेनर वाहने ये-जा करीत आहेत. येथील मालाची हाताळणी करणाऱ्या गोदामाच्या प्रवेशद्वाराजवळ खोपटा-कोप्रोली रस्त्यावर मोठमोठे खड्डे पडल्याने रस्त्यावरून मार्गक्रमण करणाऱ्या दुचाकीस्वारांच्या जीवितास धोका निर्माण झाला आहे. या वाढत्या खड्ड्यांमुळे भारतीय राष्ट्रीय महामार्ग प्राधिकरण व सार्वजनिक बांधकाम विभाग उरण यांनी अपघाताची वाट न पाहता सदर रस्त्याची पाहणी करून खड्डेमुक्त रस्ता करण्यासाठी पुढाकार घ्यावा अशी मागणी प्रवाशांकडून करण्यात येत आहे.

हेही वाचा : मत्स्यसंपदा घटल्याने लाखो मच्छीमारांवर आर्थिक संकट

उरण, जेएनपीए बंदर परिसराला जोडणारा उरण पूर्व विभागातील खोपटा-कोप्रोली हा सा. बां. विभाग उरणचा महत्त्वाचा रस्ता आहे. या रस्त्याच्या दुरुस्तीसाठी सा.बां. विभागाने या अगोदर कोट्यवधी रुपयांचा निधी खर्च केला असून या परिसरातील गोदाम व्यवस्थापकांनी निधी खर्च केला असल्याची माहिती मिळत आहे. या मार्गासाठी ३ कोटी ७५ लाखांचा निधी ठेकेदारांच्या माध्यमातून खर्च करण्यात आला होता. मात्र संबधित विभागाच्या दुर्लक्षामुळे कोट्यवधीचा निधी खर्च करूनही सदर रस्त्याची दुरवस्था झाल्याचे चित्र आहे.