पनवेल: महापालिका स्थापन झाल्यापासून सहा वर्षे उलटली, तरी पालिका आस्थापनेवर भरती प्रक्रीया झाली नव्हती. अखेर पनवेल पालिका प्रशासक तथा आयुक्त गणेश देशमुख यांनी बुधवारी जाहीरात प्रसिद्ध करुन गट ‘अ’ ते गट ‘ड’ मधील रिक्त ३७७ पदांसाठी सरळ सेवेमार्फत थेट भरतीची प्रक्रिया जाहीर केली. १३ जूलै ते १७ ऑगस्ट या दरम्यान उमेदवारांना त्यांचे अर्ज भरता येणार आहेत. या नोकर भरतीकडे अनेक वर्षांपासून सुशिक्षित तरुणांचे लक्ष्य लागले होते.
या भरती प्रकियेतप्रशासकीय, अभियांत्रिकी, तांत्रिक, विधी, अग्निशमन सेवा, सूरक्षा सेवा, माहिती व तंत्रज्ञान सेवा, लेखा व वित्त सेवा, उद्यानसेवा, शहर विकास सेवा, यांत्रिकीसेवा, सार्वजनिक आरोग्य सेवा, क्रीडा सेवा, निम वैद्यकीय सेवा, पशुवैद्यकीय सेवा, लेखा परिक्षण सेवा इत्यादी विभागातील पदांकरीता भरती होणार आहे. तुलनात्मक स्पर्धेतून निवड प्रक्रीया होण्यासाठी ही जाहीरात देण्यात आली आहे. इच्छुक उमेदवारांना http://www.panvelcorporation.com, https://mahadma.maharashtra.gov.in या संकेतस्थळांवर १७ ऑगस्टपर्यंत रात्री ११ वाजेपर्यंत ऑनलाईन पद्धतीने अर्ज करता येतील. ही परिक्षा ऑनलाईन पद्धतीने घेण्यात येणार आहे. परिक्षेचे ठिकाण आणि वेळ इमेल व एसएमएस व्दारे कळविण्यात येणार आहे. निवड प्रक्रीयेत मौखिक परिक्षा घेतली जाणार नाही. मात्र निवडसूचीतील उमेदवारांनी सादर केलेल्या कागदपत्रांची सत्यता पडताळणीसाठी (केवायसी व्हेरीफीकेशन) मुलाखत घेतली जाईल. संबंधित मुलाखतीसाठी कोणतेही प्रकारचे गुण दिले जाणार नाहीत.
