जगदीश तांडेल उरण : मंगळवारी सकाळी ८.४६ ची बेलापूर ते खारकोपर रेल्वे स्थानकात प्रवेश करीत असतांनाच डबे घसरल्याने अपघात झाला आहे.सुदैवानं या अपघातात कोणीही जखमी झालेला नाही. मात्र त्यामुळे खारकोपर – नेरुळ ते बेलापूर या लोकलचा मार्ग मागील दहा तासापासून बंद आहे. या अपघातामुळे हजारो प्रवाशांचे हाल झाले.तर दुरुतीचे काम पूर्ण होण्यासाठी आणखी वेळ लागण्याची शक्यता वर्तविली आहे.
मंगळवारी सकाळी बेलापूर वरून सुटलेली लोकल उलवे नोड मधील बामण डोंगरी स्थानकावरून पुढे खारकोपर स्थानकात येत असताना काही अंतरावर असतांनाच इंजिन सह दोन डबे रुळावरून घसरले आणि अपघात झाला. या अपघातात सुदैवाने कोणीही जखमी झाले नाहीत. या संदर्भात मध्य रेल्वेचे जनसंपर्क अधिकारी पी.डी.पाटील यांनी रेल्वे कडून दुरुस्तीचे काम वेगाने सुरू असून हे काम पूर्ण होऊन या मार्गावरील रेल्वे पूर्ववत करण्याचे काम सुरू असून दोन डबे रुळावर चढविण्यात आले असल्याची माहीती. त्यांनी दिली आहे. त्याचप्रमाणे या अपघाताचे कारण स्पष्ट नसल्याचे ही त्यांनी सांगितले.
