अखेर नवी मुंबई उप प्रादेशिक परिवहन नवीन कार्यालयाची प्रतीक्षा संपली आहे. ऑगस्टमध्ये नवीन इमारतीतून कामकाज सुरू करण्यात येईल. राज्याचे मुख्यमंत्री एकनाथ शिंदे यांच्या हस्ते उद्घाटन होणार आहे, अशी माहिती आरटीओने दिली आहे.
नेरुळ येथील नवी मुंबई वाशी उपप्रादेशिक परिवहन कार्यालयाचे नवीन इमारतीचे काम जानेवारी- फेब्रुवारी दरम्यान पूर्ण झाले होते. पंरतु ओसी न मिळाल्याने स्थलांतर रखडले होते. मात्र आता ओसी परवानगी मिळाली असून येत्या ऑगस्टमध्येच आरटीओ नवीन कार्यालयातून सुरू होणार आहे. नवी मुंबई शहराकरिता सन २००४ मध्ये नवी मुंबई उप प्रादेशिक कार्यालय सुरु करण्यात आले आहे. मात्र तेव्हा पासून हे कार्यालय वाशीतील एपीएमसी बाजारात भाडेतत्त्वावर सुरू होते. आरटीओला आता स्वतः ची इमारत उपलब्ध होणार असून नेरूळ येथे बांधून तयार असून आता ओसी ही मिळाली आहे, त्यामुळे लवकरच येथून कारभार चालणार आहे. प्रादेशिक कार्यालयाला स्वतःची जागा असावी म्हणून सिडको कडून नेरूळ सेक्टर १३ मध्ये भूखंड घेण्यात आला. मात्र सदर भूखंड ताब्यात घेण्यात सार्वजनिक बांधकाम विभागाकडून विलंब झाला होता. अखेर सन २०१९मध्ये या उप प्रादेशिक कार्यालयाच्या इमारतीचे भूमिपूजन झाले. परंतु त्यांनतर करोना आणि टाळेबंदीने या इमारतीच्या बांधकामाला खो बसला होता. अखेर आरटीओचे कामकाज आता नव्या इमारतीतुन सुरू होणार आहे.
हेही वाचा… दोन साखळी चोरांना अटक; एक मोक्का प्रकरणातील सराईत आरोपी; १० साखळी चोरी गुन्ह्यांची उकल
रस्ता सुरक्षा आणि हिरकणी कक्षाची नव्याने सुरू
सध्या आरटीओचे कार्यलय छोट्या जागेत सुरू आहे. मात्र आता नेरुळ येथील नवीन इमारत सुसज्ज अशी ४ मजली आहे. या मध्ये सर्व सुविधा उपलब्ध असणार आहेत. या नवीन कार्यलायत स्वतंत्र रस्ता सुरक्षा कक्ष आणि महिला कर्मचाऱ्यांकरिता हिरकणी कक्ष सुरू करण्यात येणार आहे. वाहतुक परवाना साठी हॉल सुविधा उपलब्ध करून देण्यात येणार आहे. सर्व अधिकाऱ्यांसाठी वेगळी केबिन उपलब्ध असणार आहेत. नागरिकांसाठी बसण्याची, पाण्याची सुविधा असणार आहे. रस्ता सुरक्षा महत्व पटवून देण्यासाठी आरटीओ इमारतीत एलईडी टिव्हीच्या माध्यमातून जनजागृती केली जाणार आहे.
हेही वाचा… कळंबोलीतील सिडको घरांना दोन वर्षातच गळती
अखेर आरटीओची नवीन कार्यलयाची प्रतीक्षा संपली असून येत्या ऑगस्टमध्ये मुख्यमंत्री एकनाथ शिंदे यांच्या हस्ते उद्घाटन करण्याचे नियोजन आहे. – हेमांगिनी पाटील, उप प्रादेशिक अधिकारी, वाशी आरटीओ
