नवी मुंबई: एपीएमसी बाजारात सध्या पावसामुळे ग्राहक रोडावले आहेत. त्यामुळे बाजारात कांद्याच्या दरात घसरण होत आहेत. तरीदेखील किरकोळ बाजारात कांद्याची दुप्पट दराने विक्री होत आहे. एपीएमसी घाऊक बाजारात प्रतिकिलो कांदा १०-१६ रुपयांनी विक्री होत आहे, किरकोळ बाजारात मात्र प्रतिकिलो २५-३० रुपये अशा दुप्पट दराने विक्री होत आहे.
यावर्षी अवकाळी पावसाने कांद्याचा दर्जा घसरला आहे. बाजारात केवळ २०% उत्तम दर्जाचा कांदा दाखल होत आहे. त्यामुळे बाजारात उच्चतम कांद्याला अधिक मागणी असल्याने दर वधारत होते. मात्र मागील आठवड्यापासून एपीएमसीत कांद्याचे दर कमी झाले आहेत.
हेही वाचा… उरण :भर पावसात एनएमएमटी नादुरुस्त; प्रवाशांचे हाल
प्रतिकिलो उच्चतम प्रतिचा कांदा १८-२२रुपयांनी कांदा विक्री होत होता. परंतु आता दर कमी झाले आहेत, प्रतिकिलो कांदा कमीत कमी १० रुपये तर जास्तीत जास्त १६ रुपयांनी विक्री होत आहे. घाऊक बाजारात दर उतरले असताना देखील किरकोळीत मात्र २५-३०रुपयांनी विकले जात आहेत.
लसणाच्या दरात १०-२० रुपयांनी घसरण
एपीएमसी बाजारात सध्या पावसामुळे आणि श्रावण महिना सुरु झाल्याने लसणाची विक्री कमी होत आहे. तसेच बाजारात व्यापाऱ्यांकडे शिल्लक लसुण असल्याने प्रतिकिलो दरात १०-२०रुपयांनी घसरण झाली आहे. त्यामुळे आधी एपीएमसीत उटी लसूण १४५-१८०रुपयांनी विक्री होत होता तो आता १४०- १६० रुपयांनी आणि देशी लसूण १२०-१५०रुपयांवरून १२०-१४०रुपयांनी विक्री होत आहे.
