नवी मुंबई – नवी मुंबईकरांना पाणीपुरवठा करणाऱ्या मोरबे धरणात यावर्षी जून महिना कोरडा गेला तर जुलै महिन्यात दमदार पाऊस पडला त्यामुळे मोरबे धरण भरण्याची शक्यता निर्माण झाली होती. त्यामुळे पालिकेने मोरबे धरण काही दिवसांतच भरेल यासाठी धरणाचे वक्राकार दरवाजे उघडण्याची चाचपणी घेतली होती. परंतु ऑगस्ट महिन्यात पावसाने दडी मारली असून मोरबे धरणात आतापर्यंत एकूण २८३८ मिमी. पावसाची नोंद झाली असताना ऑगस्ट महिन्याच्या मागील १५ दिवसांत फक्त १४२ मिमी पावसाची नोंद झाली आहे. त्यामुळे मोरबे धरण यंदा तरी भरणार की नाही असा प्रश्न निर्माण झाला आहे. कारण एकीकडे पाऊस थांबला असताना दररोज शहराला पाणीपुरवठ्यासाठी ४६० दशलक्षलीटर पाणी उपसा केले जात आहे.
यंदा जून महिन्यात पावसाने हात आखडता घेतला होता. परंतु जुलै महिन्यातील दमदार पावसामुळे धरणात चांगला जलसाठा उपलब्ध झाला आहे. शहराला पाणीपुरवठा करणाऱ्या मोरबे धरणात २३ जूनपर्यंत फक्त ३३ दिवस पाणीपुरवठा करता येईल एवढाच पाणीसाठा शिल्लक होता. परंतु जुलैच्या महिनाभरात मोरबे धरणाच्या व माथेरानच्या पाणलोट क्षेत्रात जोरदार पाऊस झाल्याने धरणाचा पाणीसाठा झपाट्याने वाढला. मोरबे धरणातून पुढील वर्षी ८ जुलै २०२४ पर्यंत नवी मुंबईकरांना सुरळीत पाणीपुरवठा करता येईल एवढा जलसाठा धरणात झाला आहे. यंदाच्या पावसाळ्यात माथेरानच्या डोंगररांगामध्ये काही दिवसांतच ४००० मिमीपेक्षा अधिक पाऊस पडला आहे. तर मोरबे धरण क्षेत्रात आतापर्यंत २८५४ मिमी. पाऊस पडला आहे.
नवी मुंबई मोरबे धरण परिसरात जुलै महिन्यात चांगल्या पावसाची नोंद झाली आहे. मोरबे धरण हे ८८ मीटरला १०० टक्के भरते. धरणात गेल्यावर्षीच्या तुलनेत अधिक जलसाठा झाला आहे. परंतु मागील १५ दिवसांपासून पावसाच्या विश्रांतीमुळे धरण भरणार का याबाबत शंका निर्माण झाली आहे.
मोरबे धरणात चांगला पाणीसाठा झाला असला तरी पावसाने मात्र चांगलीच उघडीप घेतली आहे. धरणात चांगला पाणीसाठा उपलब्ध असला तरी वर्षभराच्या पाणीपुरवठ्याबाबत पालिका नियोजनबद्ध व योग्य ती खबरदारी घेत आहे. पुढील काही दिवस पावसाची शक्यता वर्तवण्यात आली आहे. धरण १०० टक्के भरावे अशी अपेक्षा आहे. – संजय देसाई, शहर अभियंता
मागील काही दिवसांत मोरबेत झालेला पाऊस
१८ ऑगस्ट- १५.४ मिमी.
१७ ऑगस्ट- १.४ मिमी.
१६ ऑगस्ट- ०० मिमी
१५ ऑगस्ट- ३.८ मिमी.
१४ ऑगस्ट- २.२मिमी.
१३ ऑगस्ट- १९.४ मिमी.
१२ ऑगस्ट- ६.८ मिमी.
११ ऑगस्ट- २५.६ मिमी.
१० ऑगस्ट- ५.८ मिमी.
९ऑगस्ट- १०.२ मिमी.
८ ऑगस्ट- ३.२ मिमी.
मोरबे धरणातील पाणीसाठ्याची सद्यस्थिती
- आतापर्यंत पडलेला एकूण पाऊस – २८५४. ८० मिमी.
- धरणातील पाणीसाठा- ९१.७३ टक्के
- कधीपर्यंत सुरळीत पाणीपुरवठा करता येणार – ८ जुलै २०२४
