पनवेलमध्ये नव्याने समाविष्ट भागांच्या विकासावर भर

पनवेल महानगरपालिकेचा अर्थसंकल्प शनिवारी आयुक्त गणेश देशमुख यांनी स्थायी समिती सभेसमोर सादर केला. या २०१९-२०२०च्या मूळ अर्थसंकल्पात सुरुवातीच्या शिल्लक रकमेसह रुपये १०३५.९५ कोटी उत्पन्न  अपेक्षित धरण्यात आले असून रुपये १०३५.०२ कोटी खर्च अपेक्षित आहे. पनवेल महानगरपालिकेचा अर्थसंकल्प स्थायी समिती सभागृह नेते, विरोधी पक्ष नेते यांच्या उपस्थितीत मांडण्यात सादर करण्यात आला.

पाणीपुरवठा, रस्ते, अग्निशमन सेवा, शहर सफाई, आरोग्य शिक्षण, क्रीडा, दिव्यांग कल्याण, महिला बालकल्याण, वंचितांचा विकास, महापालिकेत समाविष्ट ग्रामपंचायतींचा विकास व इतर अनेक महत्त्वाच्या बाबी डोळ्यासमोर ठेवून हे अंदाजपत्रक तयार केले आहे. पनवेल महानगरपालिका मुख्यालयासाठी पनवेलमध्ये भूखंड, प्रभाग कार्यालयासाठी भूखंड, महापौर व आयुक्त यांच्या निवासस्थानांसाठी खारघर येथे भूखंड, तसेच सार्वजनिक सुविधा सेवांसाठी सिडको प्राधिकरणाकडून भूखंड उपलब्ध करून ते विकसित करण्यासाठी या अर्थसंकल्पात भरीव तरतुदी केल्या गेल्या आहेत. २०१८-१९च्या सुधारित अर्थसंकल्पात आरंभीच्या शिल्लकीसह ४९१.३३ कोटी रुपये उत्पन्न अपेक्षित असून, २७४.१७ कोटी रुपये खर्च होणार आहे व २०१९-२०च्या मूळ अर्थसंकल्पात सुरुवातीच्या शिल्लकीसह १०३५.९५ कोटी इतका खर्च अपेक्षित असून, १०३५.०२ कोटी खर्च अपेक्षित आहे.

१०३६ कोटी पालिकेकडे जमा होणे अपेक्षित आहे. यामध्ये पालिकेतील अधिकारी कर्मचारी यांच्या वेतनावर ७० कोटी खर्च अपेक्षित असून, दुरुस्ती व नव्याने होणारी बांधकामे यावर ३०९ कोटी खर्च होणे अपेक्षित आहे. शहर सफाईवर ७३ कोटी इतका खर्च करण्यात येणार आहे.

या अंदाजपत्रकाची ठळक वैशिष्टय़े म्हणजे एकूण अंदाजपत्रकाच्या मोठी रक्कम ही पनवेल महानगरपालिका क्षेत्रात समाविष्ट ग्रामीण भागातील विकासावर खर्च होणार असून, अर्थसंकल्पामधील ६० टक्के रक्कम ही विकासकामांवर खर्च होणार आहे.   – गणेश देशमुख, आयुक्त पनवेल महापालिका