नवी मुंबई : नवी मुंबई शहरातील सर्वात मोठी समस्या म्हणजे शहरात नागरीकांना वाहने उभी करकण्यासाठी जागाच नाहीत. त्यामुळे शहरभऱ बेकायदा पार्किंग झाल्याचे पाहायला मिळत आहे. भविष्यात हीच समस्या आणखी गंभीर स्वरुप धारण करणार असल्याचे चित्र आहे. नवी मुंबई महानगरपालिका क्षेत्रातील पार्कींग नियोजनासाठी सिडकोकडे महानगरपालिकेमार्फत वारंवार पाठपुरावा केला जात आहे. या दोन्ही आस्थापना आवश्यक तेवढ्या पार्किंग सुविधा पुरवण्यासाठी अपयशी ठरत असल्याचे दिसत असून पार्किंग नियोजनाचा बट्ट्याबोळ झाला आहे. पालिकेला सिडकोमार्फत पार्कींग सुविधेकरिता सीबीडी बेलापूर विभागात २ आणि वाशी विभागात १ भूखंड उपलब्ध करून देण्यात आलेला आहे. त्यातील बेलापूर येथे ४७६ चारचाकी व १२१ दुचाकीसाठी पालिकेने बहुमजली पार्किंगची व्यवस्था तयार केली असून त्याचे काम अंतिम टप्प्यात आहे. पार्किंगसाठीचे वाहनतळ पुढील ३ महिन्यात सज्ज होणार का असा प्रश्न निर्माण झाला आहे. महापालिकेच्यावतीने बेलापूर सेक्टर १५ येथील भूखंड क्रमांक ३९ वर बहुमजली वाहनतळ विकसित केले असून त्याचे काम अंतिम टप्प्यात आहे. याकामाची पालिका आयुक्तांनी नुकतीच पाहणी केली आहे. बेलापूर येथे साकारण्यात येत असलेल्या बहुमजली वाहनतळात ४७६ चारचाकी वाहने व १२१ दुचाकी वाहने पार्कींगसाठी उपलब्ध करून देण्यात आली असून सेक्टर १५ येथील कै. नागा गना पाटील उद्यानासमोरून पूर्व दिशेला वाहनतळात येण्यासाठी प्रवेशव्दार ठेवण्यात आलेले आहे. हेही वाचा >>> नेरुळमध्ये छत्रपती शिवाजी महाराजांचा ३५ लाखांचा सिंहासनारूढ पुतळा उभारणार; ठाणे जिल्हाधिकाऱ्यांचीही मिळाली परवानगी वाहनतळाच्या लगत महावितरणाचे इलेक्ट्रीकल सबस्टेशन असल्याने त्याचा विचार करूनच व त्यानुसार इमारतीच्या आराखड्यामध्ये अत्यावश्यक बदल करून हे बहुमजली वाहनतळाचे काम करण्यात येत आहे. सीबीडी बेलापूर विभागातच आणखी एक वाहनतळाची जागा उपलब्ध करून देण्यात आली असून त्याठिकाणी सदस्यस्थितीत डांबरीकरण करून तसेच वाहने उभी करण्यासाठी पट्टे मारून भूखंडावर वाहनतळ विकसित करण्याच्या दृष्टीने कार्यवाही करण्यात येणार आहे.शहरातील पार्किंग सुविधेबाबत सिडकोकडून मिळालेल्या पार्किंगच्या भूखंडाबाबतही पार्किंग सुविधा निर्माण करण्याबाबत नियोजन करण्यात आल्याची माहिती शहर अभियंता संजय देसाई यांनी लोकसत्ताला दिली. नवी मुंबई शहरात पार्किंगची व्यवस्था करण्यासाठी पालिका प्रयत्नशील असून पार्किंगबाबत योग्य नियोजन व आराखडा बनवण्याचे निर्देश देण्यात आले आहेत. वाढती वाहनसंख्या पाहता पार्किंगबाबतही सुविधा निर्माण करण्याचा पालिकेचा प्रयत्न आहे. -राजेश नार्वेकर, आयुक्त, नवी मुंबई महापालिका
