लोकसत्ता प्रतिनिधी
नवी मुंबई : नवी मुंबई महापालिकेच्या मालमत्ता कर विभागाने पालिकेच्या इतिहासात प्रथमच कर थकबाकी असलेल्या जप्त मालमत्तांची लिलावाद्वारे विक्री करण्याचा निर्णय घेतला आहे. तसेच जप्त केलेल्या मालमत्तांच्या लिलाव मूल्यांकनासाठी अधिकृत शासकीय मूल्यकारांची नियुक्ती करण्याची प्रक्रिया सुरू केली आहे. त्यामुळे जप्तीची कारवाई प्रस्तावित असलेल्या मालमत्ता कर धारकांनी आपला थकीत मालमत्ताकर त्वरीत भरावा असे आवाहन नवी मुंबई महापालिकेने केले आहे. अन्यथा जप्त केलेल्या मालमत्तांची लिलाव कारवाई करण्यात येईल असे निर्देशित केले आहे.
महानगरपालिकेच्या अखत्यारित असणाऱ्या विविध मालमत्तांवर ‘कर आकारणी व कर संकलन विभाग’ यांच्यामार्फत मालमत्ता कर आकारणी व वसूलीची कार्यवाही करण्यात येते. ‘मालमत्ता कर आकारणी पुस्तकात नोंद असलेल्या मालमत्तांची कर देयके ‘महाराष्ट्र महानगरपालिका अधिनियमातील अनुसूची ‘ड’ प्रकरण ८ नियम ३९ नुसार तयार करण्यात येते. विहित मुदतीत मालमत्ता कर देयकांची रक्कम न भरलेल्या मालमत्तेवर कलम १२८ व प्रकरण ८, नियम ४२ ते ४८ मधील तरतुदीनुसार जप्ती कारवाई करण्यात येते. या जप्त मालमत्तांवर लिलावाद्वारे विक्री कार्यवाहीची तरतूददेखील नियमानुसार करण्यात आलेली आहे.
थकीत मालमत्ताकराच्या वसूलीसाठी जप्त केलेल्या मालमत्तांची लिलावाद्वारे विक्री करणे व त्यासाठी मालमत्तेचे मूल्यांकन करणे गरजेचे आहे. मालमत्तेचे मूल्यांकन करण्याकरिता महापालिका पॅनेलवर शासन नोंदणीकृत असलेल्या इच्छुक शासकीय मूल्यकारांच्या नियुक्तीसाठी विविध वर्तमानपत्रांतून जाहीर प्रकटन देण्यात आले होते.
या प्रकटनाला १० शासकीय मूल्यकारांनी प्रतिसाद दिला. त्यामुळे सुयोग्य शासकीय मूल्यकाराची नियुक्ती लवकरच करण्यात येणार आहे. तसेच नेमून दिलेल्या मूल्यकारामार्फत मालमत्ताकार थकलेल्या जप्त मालमत्तेचे मूल्यांकन करण्यात येणार आहे. त्यानंतरच मालमत्ता कर थकीत असलेल्या मालमत्तांची लिलावाद्वारे विक्रीची प्रक्रिया जलद गतीने करण्यात येणार आहे. दरम्यान, याबाबत पालिका आयुक्त डॉक्टर कैलास शिंदे यांना संपर्क केला असता संपर्क झाला नाही.
अभय योजना
पालिकेने ३१ मार्चपूर्वी थकीत कर भरावा यासाठी अभय योजनाही लागू केली आहे.त्यामुळे एक रकमी थकीत मालमत्ता कर भरल्यास शास्तीवर ५० टक्केंची सूट मिळणार आहे. परंतु अद्याप सातत्याने पाठपुरावा करुनही मालमत्ता कर न भरणाऱ्यांवर यावर्षी पालिकेच्या इतिहासात प्रथमच मालमत्तावर जप्ती आणून त्यांच्या मालमत्तांची नियमानुसार लिलावाद्वारे विक्री करण्याचा निर्णय पालिका आयुक्तांनी घेतला आहे. ३१ मार्चनंतर धडक कारवाईला सुरुवात करणार असल्याचे चित्र आहे.
मालमत्ता करलक्ष्य
एकूण मालमत्ताधारकांची संख्या – ३ लाख ४५ हजार
२०२४-२५ पर्यंत जमा मालमत्ता कर – ६४१ कोटी
मालमत्ता कर वसुलीचे यंदाचे लक्ष्य – ९०० कोटी
