एकनाथ शिंदेंच्या मनात उठावाचे बीज मीच पेरले होते. महाविकास आघाडी स्थापन झाल्यानंतर दोन महिन्यांनीच मी एकनाथ शिंदेंना घेऊन नंदनवन येथे साडेचार तास बसलो होतो, असा दावा शिंदे गटाचे नेते विजय शिवतारे यांनी केला आहे. शिवतारे यांच्या या विधानानंतर ठाकरे गटातील नेत्यांकडून शिवतारे यांच्यावर कठोर शब्दांत टीका केली जात आहे. ठाकरे गटातील नेते तथा खासदार संजय राऊत यांनीदेखील शिवतारे यांच्या विधानाचा समचार घेतला आहे. शिवतारे यांचे नशीब फुटले आहे. आगामी काळात त्यांना ते समजेलच, असे संजय राऊत म्हणाले. ते आज (२५ डिसेंबर) नवी मुंबईत ठाकरे गटाच्या शिवसेनेच्या दोन शाखांच्या उद्घाटन कार्यक्रमात बोलत होते.
हेही वाचा >>> अत्याचाराची तक्रार करणाऱ्या महिलेचा दाऊद गँगशी संबंध? राहुल शेवाळेंच्या दाव्याने खळबळ, नवाब मलिकांचे नाव घेत म्हणाले…
“सर्व गोष्टी पैशांने विकत घेता येत नाहीत. समोर बसलेले श्रोते शिवसेनेचे धन आहे. हीच शिवसेनेची खरी ताकद आहे. आपण बंडखोरी केली पाहिजे याचे बीज मीच मुख्यमंत्री एकनाथ शिंदे यांच्या डोक्यात भरवले, असे एक माजी मंत्री म्हणाला. अरे तुझं नशीब फुटलं आहे. तू फुटला नाहीस. भविष्यात तुम्हाला कळेल,” असे संजय राऊत म्हणाले.
“संजय राऊत जे बोलतो ते घडंत. मला भविष्यात काय घडणार याची माहिती आहे. महाभारतात जसा एक संजय होता, अगदी तसाच एक संजय शिवसेनेत आहे. हा संजय कायम कुरुक्षेत्रावरच असतो. लढत असतो,” असेही संजय राऊत म्हणाले.
विजय शिवतारे काय म्हणाले?
मुंबईतील एका सभेत बोलताना, एकनाथ शिंदेंच्या मनात उठावाचे बीज मीच पेरलं, असा दावा विजय शिवतारे यांनी केला होता. “२०१९ मध्ये राज्यात जे महाविकास आघाडीचे सरकार स्थापन झाले, ते राज्याच्या हिताचे नव्हते. पहिल्या दोन महिन्यातच उचल खाल्ली होती. हा उठाव करायचं बीज एकनाथ शिंदेच्या डोक्यात विजयबापू शिवतारेंनी घातलं”, असे शिवतारे म्हणाले होते. तसेच “महाविकास आघाडी स्थापन झाल्यानंतर दोन महिन्यांनीच मी एकनाथ शिंदेंना घेऊन नंदनवन येथे बसलो होतो. मी तेव्हाच त्यांना सांगितलं की राज्यात जे सुरू आहे, ते महाराष्ट्राच्या हिताचं नाही. जे चाललं आहे ते चुकीचं आहे. तुम्ही उद्धव ठाकरेंना सांगा की ही महाविकास आघाडी तोडली पाहिजे. राज्यात शिवसेना-भाजपाचे सरकार आले पाहिजे”, अशी प्रतिक्रियाही त्यांनी दिली होती.
