‘सुंदर माझा दवाखाना’ अभियानातून नवी मुंबईतील आरोग्य सुविधांचे पालटणार रूप

‘सर्वांना आरोग्य समता, आरोग्य सुविधा’ या संकल्पनेवर आधारित या वर्षीचा आरोग्य दिन साजरा केला जात असून महापालिकेच्या २३ नागरी प्राथमिक आरोग्य केंद्रांत आणि चार रुग्णालयांत हा उपक्रम आठ दिवस राबविला जात आहे. या उपक्रमांतर्गत महानगरपालिकेची सर्व रुग्णालये आणि नागरी प्राथमिक आरोग्य केंद्रांमध्ये स्वच्छ व प्रसन्न वातावरण राखण्याकरिता भोवतालचा परिसर, सर्व अंतर्गत विभाग, स्वच्छतागृहे, भांडारगृहे, उद्यान यांची स्वच्छता, आवाराचे व दर्शनी भागातील सुशोभीकरण, रंगरंगोटी आणि आरोग्य संस्थेमार्फत जनतेला देण्यात येणाऱ्या सेवांचे फलक दर्शनी भागात लावणे अशी विविध कामे करण्यात येणार आहेत.

हेही वाचा… नवी मुंबई : शहर स्वच्छता कार्यात महिलांचे योगदान मोलाचे- पालिका आयुक्त राजेश नार्वेकर

हेही वाचा… पावसामुळे एपीएमसीत भाजीपाल्याची आवक घटली, भाज्यांचे दर स्थिर, वाशीतील एपीएमसी घाऊक बाजार

त्याचप्रमाणे औषध भांडारगृह, कार्यालयीन विभाग, प्रयोगशाळा विभाग, औषध विभाग अशा विविध विभागांतील साहित्य, रेकॉर्ड, रजिष्टर यांची सुव्यवस्थित रचना करून त्यावर विषयानुरूप चिठ्ठ्या लावल्या जाणार आहेत. हे अभियान रुग्णालये व नागरी प्राथमिक आरोग्य केंद्रांत प्रभावीपणे राबविण्यात यावे व रुग्णाला सुखदायी वाटेल अशी प्रसन्न वातावरणनिर्मिती करावी, असे स्पष्ट करीत महापालिका आयुक्त राजेश नार्वेकर यांनी महिन्याच्या पहिल्या शनिवारी स्वच्छता दिन पाळावा आणि स्वच्छता ही नियमित करण्याची गोष्ट असल्याने स्वच्छतेत सातत्य राखावे, असे निर्देश दिले आहेत.