पनवेल: तळोजा औद्योगिक वसाहतीमध्ये महिन्याभरापूर्वी राज्याचे उद्योगमंत्री उद्योजकांच्या भेटीसाठी आले होते. त्यामुळे वसाहतीमधील मुख्य कॉंक्रीटच्या रस्त्यावर गतिरोधकाची दुरुस्ती करुन खड्डे पडलेल्या गतिरोधकाला डांबरीकरणाचा लेप लावण्यात आला होता.
मंत्र्यांची बैठक पार पडली आणि सतत पडणा-या पावसाळ्यात गतिरोधकावरील डांबराचा लेप गायब झाला. पुन्हा तळोजात जीवघेणे गतिरोधक तयार झाले आहेत. याबाबत स्थानिक पोलीस आणि वाहतूक पोलिसांनी पत्र देऊन या गतिरोधकांची डागडुजी करण्याची विनंती महाराष्ट्र औद्योगिक विकास महामंडळाकडे केली आहे.
हेही वाचा… पनवेल: सर्पदंशाने तरुणाचा मृत्यू
२४ जुनला राज्याचे उद्योगमंत्री उदय सामंत यांनी तळोजा औद्योगिक वसाहतीमध्ये येऊन उद्योजकांच्याा प्रतिनिधींची भेट घेतली होती. या भेटीपूर्वी तळोजातील मुख्य रस्त्यावरील गतिरोधकांवरील डांबर निघून गेले होते. त्यामुळे उद्योगमंत्र्यांसमोर सामान्य प्रवाशांना भेडसावणारी समस्या दिसू नये म्हणून औद्योगिक विकास महामंडळाच्या अधिका-यांनी तातडीने गतिरोधकांवर डांबर लावून गतिरोधक ठीकठाक केले. परंतु महिन्याभरानंतर गतिरोधकावरील तात्पुरता डांबराचा लेप निघून गेल्याने गतिरोधक धोकादायक झाले आहेत. याविषयी वाहतूक विभागाचे वरिष्ठ पोलीस निरिक्षक सूनील कदम यांनी तळोजा येथील औद्योगिक विकास महामंडळाच्या कार्यालयाकडे लेखी पाठपुरावा केला आहे.
