रेल्वे स्थानकाबाहेर प्रवासी महिलेच्या खूनातील रहस्य उलगडले ; पती व त्याच्या प्रेयसीने दिली होती सुपारी

पनवेल : चार दिवसांपूर्वी पनवेल रेल्वेस्थानकातील पूर्वबाजूस नवीन पनवेल वसाहतीमध्ये स्थानक परिसरात ३९ वर्षीय प्रियंका रावत या प्रवासी महिलेचा अनोळखी मारेक-यांनी खून केल्याच्या घटनेने सर्वत्र खळबळ माजली होती. या प्रकरणी नवी मुंबई पोलीस दलाने वेगवेगळी शोधपथक स्थापन करुन मारेक-यांचा तपास सुरु केला होता. पोलिसांच्या अधिक तपासात प्रियंका यांच्या पतीने व त्याच्या प्रियसीने हा कट रचून मारेक-यांना सुपारी दिल्याचे उजेडात आले आहे. देखतसिंग असे प्रियंका यांच्या संशयीत आरोपी पतीचे नाव आहे. देखतसिंग याचे अनैतिक संबंध असल्याची माहिती प्रियंका यांना नुकतीच कळाली होती. प्रियंका आणि देखतसिंग हे परिवारासह विहीघर गावातील महालक्ष्मी सोसायटीत राहत होते. प्रियांका या ठाणे येथील डीजीटल मार्केटींग कंपनीमध्ये काम करुन संसाराला मदत करत होत्या.