पनवेल : शहर स्वच्छतेकडे सिडको महामंडळाचे दुर्लक्ष झाल्यामुळे उलवे वसाहतीमध्ये कोणीही या आणि फलक लावून जा अशी स्थिती निर्माण झाली आहे. सध्या उलवे वसाहतीमधील मुख्य चौकात अवैध फलक लावणाऱ्यांची स्पर्धा लागल्याने फलकांचे बेट चौकात तयार झाले आहे. शहर विदृप करणारी ही फलक कधी काढणार याकडे सामान्यांचे लक्ष लागले आहे.
सिडको महामंडळाकडे उलवे, द्रोणागिरी या वसाहतींमध्ये सेवा पुरवणे आणि वसाहतीच्या देखरेखीची जबाबदारी आहे. पाण्याचा प्रश्न वसाहतीमध्ये पावसाळ्यातही सिडको सोडवू शकली नाही. पाण्याचा साठा नसल्याने सिडको पाण्याचा प्रश्न तातडीने सोडवू शकत नाही असे असले तरी सिडको प्रशासनाकडे अवैध फलक काढण्यासाठी मनुष्यबळ असताना सुद्धा सिडकोच्या अतिक्रमण नियंत्रण विभागाकडून शहरातील अवैध फलकांवर कारवाई केली जात नाही.
हेही वाचा…सिडकोवसाहतींमधील २० टक्के पाणी कपात रद्द होणार
सध्या उलवे शहरातील सेक्टर १९ व २३ येथील चौक हे फलकांचे बेट बनले आहेत. वसाहतीमधील शगुण चौकात तर सर्वाधिक फलक झळकवले आहेत. वसाहतीमधील सिग्नल यंत्रणेचे उभारलेले लोखंडी बार तसेच झाडांचा आधार घेऊन फलक लावले जात आहेत. अवैध फलक लावणाऱ्यांवर सिडकोच्या बांधकाम नियंत्रण विभागाचा अंकुश राहीलेला नसल्याचे चित्र वसाहतीमध्ये आहे. अवैध फलकांवर राजकीय पुढाऱ्यांची छायाचित्र इच्छा नसतानाही रहिवाशांना पहावी लागत आहेत. याबाबत सिडको मंडळाच्या जनसंपर्क विभागाकडे संपर्क साधला असता प्रतिसाद मिळाला नाही.
