उरण : नगरपरिषदेने उरण-मोरा मार्गावर निवृत्त कर्मचाऱ्यांच्या विरंगुळ्यासाठी पेन्शनर्स पार्क तयार केलं होतं. मात्र सध्या या जागेवर मोठ्या प्रमाणात अतिक्रमण झाले असून येथील पदपथावर नगरपरिषदेने लावलेल्या फलकाव्यतिरिक्त पाय ठेवण्यासाठी एक इंचसुद्धा जागा शिल्लक नाही. याकडे उरण नगरपरिषदेचे दुर्लक्ष होत आहे. त्यामुळे निवृत्त व ज्येष्ठ नागरिकांकडून नाराजी व्यक्त केली जात आहे.
उरण शहरातील ज्येष्ठ खासकरून निवृत्त नागरिकांना गप्पा आणि विरंगुळा म्हणून बसता यावे याकरिता उरण मोरा मार्गावर पेन्शनर्स पार्क जाहीर करण्यात आलं होतं. याठिकाणी तसा उरण नगर परिषदेचा फलक आहे. काही वर्षांपूर्वी या ठिकाणी बसण्याची व्यवस्था म्हणून बाकडेही होते. त्यामुळे शहरातील आणि तालुक्यातील कामानिमित्त ये जा करणारे निवृत्त त्याचा लाभ घेत होते. मात्र हळूहळू येथीलबाकडे गायब झाले. त्यानंतर या जागेत अनेक व्यवसाय सुरू झाले. त्यांच्या अतिक्रमणामुळे सध्या येथील पदपथावरील पेन्शनर्स पार्क हा फलक तेवढा शिल्लक आहे. या संदर्भात उरण नगरपरिषदेने मुख्याधिकारी समीर जाधव यांच्याशी संपर्क साधला असता प्रतिसाद नव्हता.
हेही वाचा – उरण : शहरावर आता सीसीटीव्हीची नजर, महत्त्वाच्या ठिकाणांवर पोलिसांचा २४ तास वॉच
उरणमधील ज्येष्ठ आणि निवृत्त नागरिकांची संख्या वाढली आहे. आशा नागरिकांना बसण्यासाठी असलेलं उरणमधील एकमेव ठिकाण शिल्लक राहिलेलं नाही. याकडे नगरपरिषदेने लक्ष द्यावे, अशी मागणी संरक्षण विभागातील निवृत्त कर्मचारी अशोक जी. म्हात्रे यांनी केली आहे.
