नवी मुंबई – गणेशोत्सवादरम्यान महापालिका श्री मूर्ती विसर्जन करण्यासाठी स्थानिक पट्ट्यातील पोहणाऱ्या तरुणांची तात्पुरत्या स्वरुपात मानधनावर स्वयंसेवक म्हणून नेमणूक करते. मात्र या तरुणांना कोणतेही विमा सुरक्षा महापालिकेकडून दिली जात नाही. मात्र तरीही मुले काम करीत असतात. राज्य शासनाने ज्याप्रमाणे गोविंदांना विमा कवच दिले आहे त्याप्रमाणे श्री मूर्ती विसर्जन करणाऱ्या स्वयंसेवकांनादेखील महापालिका विम्याचे सुरक्षा कवच द्यावे, अशी मागणी होत आहे.
नवी मुंबईत दिघ्यापासून ते बेलापूरपर्यंत एकूण २३ तलावात दरवर्षी श्री मूर्तींचे विसर्जन केले जाते. या मूर्त्या विसर्जन करण्यासाठी स्थानिक विभागतील पोहणाऱ्या ७०० हून अधिक स्वयंसेवकांची महापालिका त्या दिवसांसाठी नेमणूक करते. या दिवसांत नवी मुंबईत ३० हजारांहून अधिक घरगुती व १५००च्या घरात सार्वजनिक श्री मूर्तीचे विसर्जन केले जाते. मात्र मूर्ती विसर्जन करतेवेळी केलेली नेमणूक ही तात्पुरत्या स्वरुपात केली जाते व या बदल्यात या स्वयंसेवकांना अल्प मानधन दिले जाते. मात्र या स्वयंसेवकांचा कुठलाही विमा पालिकेच्यावतीने उतरवीला जात नाही.
मूर्ती विसर्जन करतेवेळी जवळपास चौदा चौदा तास स्वयंसेवकांना पाण्यात राहावे लागते. तलावात मोठमोठ्या मूर्त्या विसर्जन करण्यासाठी येत असल्याने मोठी दुर्घटना होण्याची जास्त शक्यता असते. तसेच तासनतास पाण्यात राहावे लागत असल्याने आजरी पडण्याचीही जास्त शक्यता असते. मूर्ती विसर्जन करतेवेळी स्वयंसेवकांना १४ ते १६ तास सतत पाण्यात राहावे लागते. त्यामुळे अंगदुखी, डोकं दुखी, सर्दी,आणि तापासारख्या आजारांना समोरे जावे लागते. राज्य शासनाने ज्याप्रमाणे गोविंदांना विमा कवच दिले आहे त्याप्रमाणे श्री मूर्ती विसर्जन करणाऱ्या स्वयंसेवकांनादेखील महापालिका विम्याचे सुरक्षा कवच द्यावे, अशी मागणी कोपरी गावातील श्री मूर्ती विसर्जन स्वयंसेवक विलीन पाटील यांनी केली आहे.
हेही वाचा – सिडकोची फसवणूक प्रकरणी शिरीष घरत यांच्या विरोधात गुन्हा दाखल
श्री मूर्ती विसर्जन करणाऱ्या स्वयंसेवकांना महापालिका मानधन देते. मात्र त्यांचा विमा उतरवत नाही. याबाबत वरिष्ठ अधिकाऱ्यांसोबत चर्चा केली जाईल. – श्रीराम पवार, उपायुक्त, परिमंडळ २, नवी मुंबई महानगर पालिका.
