कारवाई टाळण्यासाठी पर्यायी मार्ग

दापचरी सीमा तपासणी नाका आणि क्षेत्रीय परिवहन नाका येथे गुजरातकडून येणाऱ्या वाहनांची तपासणी केली जाते. दापचरी येथील क्षेत्रीय परिवहन कार्यालयाच्या (आरटीओ तपासणी नाके) तपासणी नाक्याद्वारे ओव्हरलोड  (जादा भार), वाहनांना ठरवून दिलेल्या क्षमतेपेक्षा जास्त माल भरला तर त्यांच्यावर दंडात्मक कारवाई केली जाते. जादा भार वाहणाऱ्या वाहनांना मोठय़ा प्रमाणात अपघात होतात. तसेच रस्त्याचेही मोठय़ा प्रमाणात नुकसान होते त्यामुळे अशा वाहनांवर दंड आकारला जातो. वाहनांमध्ये मर्यादेपेक्षा जादा माल भरल्यास तर कमीत कमी २० हजार रु डी.ए. दंड आकारला जातो. एक टनासाठी एक हजार, दोन टनासाठी तीन हजार आणि तीन टन असेल तर सहा हजार रुपये आणि तिथून पुढील प्रत्येक टनासाठी चार हजार रुपये  प्रतिटन अतिरिक्त दंड आकारला जातो. त्यामुळे हा दंड वाचवण्यासाठी सीमा तपासणी नाका, आणि क्षेत्रीय परिवहन तपासणी नाका टाळण्यासाठी मालवाहतूकदार आपली वाहने तलासरी-उधवा -धुंदलवाडी आणि तलासरी – उधवा-सायवन – चारोटी या मार्गे आपली वाहने नेतात. त्यामुळे सीमा तपासणी नाका आणि क्षेत्रीय परिवहन तपासणी नाका यांचे दंड वसूल न झाल्यामुळे  मोठय़ा प्रमाणात नुकसान होते.

रात्रीच्या वेळी ही वाहतूक मोठय़ा प्रमाणात चालते. एकीकडे दंड न भरल्यामुळे शासनाचे नुकसान तर होतच आहे. तर दुसरीकडे ही वाहने तलासरी उधवा धुंदलवाडी, तलासरी- उधवा-सायवन-चारोटी या रस्त्याने जात असल्याने या रस्त्याची अवस्था बिकट झाली आहे. या रस्त्यावर चालणाऱ्या या अवजड  वाहनांमुळे रस्त्यावर खूप मोठय़ा प्रमाणात मोठमोठाले खड्डे पडले आहेत. त्यामुळे तलासरी, उधवा, धुंदलवाडी , सायवन या भागातील नागरिकांना या रस्त्याने आपली वाहने चालवणे त्रासदायक झाले आहे. ट्रेलर सारखी वाहने या रस्त्याने जात असल्याने अपघाताचे प्रमाणसुद्धा मोठय़ा प्रमाणात वाढले आहे. तरी ही चोरटय़ा पद्धतीने होणारी वाहतूक तात्काळ थांबवली जावी, अशी मागणी या भागातील नागरिकांकडून केली जात आहे.

दापचरी येथील सीमा तपासणी नाका आणि आरटीओ तपासणी नाका चुकवण्यासाठी क्षमतेपेक्षा जादा माल वाहणारी वाहने तलासरी उधवा सायवन चारोटी, तलासरी उधवा धुंदलवाडी मार्गे जातात. त्यामुळे या भागातील रस्त्यांचे मोठय़ा प्रमाणात नुकसान होत आहे. तसेच मोठय़ा प्रमाणात अपघात ही होत आहेत. तरी या भागातून होणाऱ्या अवैध वाहतूक रोखण्यासाठी आरटीओ आणि पोलीस खात्याला पत्र दिली आहेत. तरी या वाहनांवर कारवाई केली जावी.

 -काशिनाथ चौधरी, माजी बांधकाम सभापती, जि. प. पालघर

नाके बंद होणार

देशभरात वस्तू आणि सेवा कर (जीएसटी) लागू केल्यामुळे केंद्र सरकार आगामी काळात राज्यांच्या सीमेवर असलेले क्षेत्रीय परिवहन तपासणी नाके बंद करणार आहे. वस्तू आणि सेवा कराची आकारणी होत असल्यामुळे राज्यांच्या तपासणी नाक्यांची आवश्यकता नसल्याचे केंद्राचे म्हणणे आहे. वाहन आणि वाहनचालकांची माहिती परिवहन आणि सारथी या ऑनलाइन प्रणालीवर उपलब्ध आहे.