लोकसत्ता प्रतिनिधी पालघर: विकास कामाचे बिल देण्यावरून भाजपा प्रेरित उपसरपंच तसेच भाजपाचे नेते यांच्यात वाद उफळल्याने दांडी ग्रामपंचायत कार्यालयात काल (मंगळवार) सायंकाळी तुफान हाणामारी होऊन ग्रामपंचायतच्या मालमत्तेचे नुकसान झाले आहे. या प्रकरणात २१ जणांविरुद्ध तक्रार दाखल करण्यात आली असून या सर्वांना पोलिसांनी ताब्यात घेण्याची प्रक्रिया सुरू केली आहे. गावातील एका विकास काम उपसरपंच यांचे नातेवाईक तसेच अन्य एका भाजप कार्यकर्त्यांनी एकत्रितपणे केल्यानंतर या कामाचे बिल कोणी सादर करावे यावरून वाद निर्माण झाला होता. त्यावरून महिला उपसरपंच नमिता तामोरे तसेच भाजपाचे नेते विजय तामोरे यांनी काल सायंकाळी ग्रामपंचायत सदस्यांच्या उपस्थितीत ग्रामपंचायत कार्यालयात अनौपचारिक बैठक आयोजित केली होती. आणखी वाचा-शिक्षकांचा घरभाडे भत्ता रद्दच मुख्यालयाच्या ठिकाणी न राहणाऱ्या शिक्षकांना धक्का या बिलासंदर्भात गरमागरणीच्या वातावरणात चर्चा सुरु असताना दोन गटांमध्ये जोरदार हाणामारी होऊन किमान सहा लोक जखमी झाले आहेत. यामध्ये दोन्ही बाजूच्या समर्थकांनी ग्रामपंचायतच्या खुर्च्यांची एकमेकांवर आदळ आपट आणि मोडतोड केली तसेच ग्रामपंचायतच्या इतर मालमत्तेचे देखील नुकसान झाल्याचे दिसून आले आहे. या प्रकरणात दोन्ही गटांच्या २१ सदस्यांविरुद्ध हाणामारी तसेच दंगा करण्याचे आरोप झाले असून या सर्वांना सातपाटी सागरी पोलीस स्टेशन मध्ये ताब्यात घेण्यात येत आहे. या प्रकरणात पोलिसांनी सरकारी कामात अडथळा कलमानुसार कारवाई करण्याची मागणी इतर राजकीय पक्षांनी केली आहेत. दांडी गावातील एका विशिष्ट गटाची असलेली दहशत मोडून काढण्यासाठी पोलिसांनी निःपक्ष कारवाई करण्याची मागणी पुढे येत आहे.
