पालघर : टाटा सन्सचे माजी अध्यक्ष सायरस मिस्त्री यांच्या अपघात प्रकरणात वाहन चालविणाऱ्या डॉ. अनाहिता पंडोल यांच्याविरुद्ध कासा पोलीस स्टेशनमध्ये हलगर्जीपणा तसेच बेदरकारपणे वाहन चालवणे अंतर्गत कलमानुसार गुन्हा दाखल करण्यात आला आहे. गुजरातमधील उद्धवाडा येथून धार्मिक कार्यानंतर मुंबईकडे परतताना चारोटीजवळील सूर्या नदीवरील पुलाच्या कठडय़ाला ४ सप्टेंबर रोजी दुपारी भरधाव असणाऱ्या मर्सिडीज बेंझ गाडीने धडक दिली होती. या अपघातात सायरस मिस्त्री तसेच जहांगीर पंडोल यांचे निधन झाले होते, तर दरायस व डॉ. अनाहिता पंडोल या जखमी झाल्या होत्या. या प्रकरणात प्रादेशिक परिवहन अधिकारी तसेच मर्सिडीज बेंझ इंडिया या कंपनीच्या तांत्रिक तपासणी अहवाल प्राप्त केल्यानंतर तसेच चौकशी अधिकारी यांनी प्रत्यक्षदर्शी साक्षीदार यांच्याकडे विचारपूस केल्यानांतर पंडोल यांच्या विरोधात गुन्हा दाखल करण्यात आला आहे.
