पालघरमध्ये निकाल काहीही लागला तरीही सत्ताबदल नाही

पालघर  : पालघर जिल्ह्यातील १५ जिल्हा परिषद व १४ पंचायत समिती जागांसाठी होणाऱ्या निवडणुकीच्या निकालानंतर कोणत्याही ठिकाणी सत्तापालट होण्याची शक्यता नसली तरीही आगामी काळात नवीन राजकीय समीकरणे निर्माण होण्यास बदललेले पक्षीय बलाबल महत्त्वपूर्ण ठरणार आहे.

पालघर जिल्हा परिषदेच्या ५७ जागांपैकी रद्द झालेल्या जागांमध्ये सर्वाधिक फटका राष्ट्रवादी काँग्रेसला बसला होता. या पक्षाला मिळालेल्या अपक्षांच्या मदतीमुळे एकूण सात जागा रिक्त झाल्या असून भाजपाच्या चार, शिवसेनेच्या तीन तर कम्युनिस्ट पक्षाची एक जागा रिक्त झाली आहे. सद्य:स्थितीत पालघर जिल्हा परिषद शिवसेना, राष्ट्रवादी काँग्रेस, बहुजन विकास आघाडी, कम्युनिस्ट पक्ष व काँग्रेस हे एकत्रित सत्तास्थानी आहेत. त्यामुळे जिल्हा परिषदेत बहुमतासाठी आवश्यक २९ जागांचे गणित सत्तेमध्ये असलेल्या पक्षांच्या विद्यमान सदस्य संख्याने पूर्ण होत आहे.

असे असले तरी सव्वा वर्षाच्या कार्यकाळानंतर अनुसूचित जमातीच्या महिलांसाठी आरक्षित असलेले जिल्हा परिषद अध्यक्षपद अनुसूचित जमातीच्या कोणत्याही उमेदवारासाठी खुले होणार आहे. २०१९ साली राज्याप्रमाणे जिल्ह्यात महाविकास आघाडी निर्माण करताना सत्ता वाटप अडीच वर्षांच्या कार्यकाळानंतर अध्यक्षपद राष्ट्रवादी काँग्रेसला देण्याबाबत आश्वासन दिल्याचे सांगितले जात आहे.

सव्वा वर्षाच्या जिल्हा परिषदेच्या अध्यक्षांच्या कार्यकाळानंतर झालेल्या निवडणुकीत नवीन सत्ता समीकरण अस्तित्वात आणण्याच्या दृष्टीने हालचाली झाल्या होत्या. तसेच राष्ट्रवादी काँग्रेसमधील पाच सदस्यांनी स्वतंत्र गट स्थापन केले. राजकीय स्थित्यंतर होण्याची चिन्ह दिसू लागली होती. मात्र अखेरच्या क्षणी पक्षश्रेष्ठींनी या प्रकरणात गांभीर्याने लक्ष घातल्याने तसेच महाविकास आघाडी कायम ठेवल्यासंदर्भात स्थानीय पदाधिकाऱ्यांना कडक शब्दांत सूचित केल्याने समीकरणे पूर्ववत राहिली.

राजकीय पक्षांची कसोटी

जिल्हा परिषदेच्या पोटनिवडणुकीत शिवसेना, राष्ट्रवादी काँग्रेस या बहुविकास आघाडीतील घटक पक्ष बहुतांश रिक्त झालेल्या जागांवर उमेदवार उतरवले असून भाजपादेखील सर्व जागा लढवत आहेत. त्यामुळे या पोटनिवडणुकीच्या निमित्ताने प्रत्येक राजकीय पक्ष जिल्हा परिषदेमधील आपले बलाबल वाढवण्यासाठी कसोशीने प्रयत्न करीत आहेत.

या निवडणुकीत वाडा तालुक्यात पाच, डहाणू तालुक्यात चार, पालघर व मोखाडा तालुक्यात प्रत्येकी दोन, तर विक्रमगड व तलासरी तालुक्यात प्रत्येकी एक जागेवर जिल्हा परिषदेची लढत होत आहे. सद्य:स्थितीत शिवसेनेचे १५ अपक्षांच्या पाठिंब्याने राष्ट्रवादी व भाजपाचे प्रत्येकी आठ, कम्युनिस्ट पक्षाचे पाच, बहुजन विकास आघाडीचे चार, तसेच काँग्रेस व अपक्ष प्रत्येकी एक सदस्य असे विद्यमान बलाबल आहे. त्यामुळे सध्याच्या स्थितीत महाविकास आघाडीकडे पूर्ण जागांचा विचार केल्यानंतर बहुमत आहे.

  आज होणाऱ्या निवडणुकीत जिल्हा परिषदेच्या १५ जागांसाठी ७४, तर पंचायत समितीच्या १४ जागांसाठी ७० उमेदवार रिंगणात आहेत. स्थानिक स्वराज्य संस्थेच्या निवडणुकीत विकासाचा मुद्दा सोबत प्रचार यंत्रणेतील पक्ष कार्यकत्र्यांची बांधणी व निवडणुकीच्या पार्श्वभूमीवर वितरित होणारा पैसा हेदेखील तितकेच महत्त्वपूर्ण घटक आहेत.