वाहतूक, पैसे पाठवणं असेल किंवा विमा… आजपासून बदलले ‘हे’ महत्त्वाचे नियम

1/

देशात सध्या करोनाचं संकट सुरू असलं तरी आजपासून आपल्या दैनंदिन जीवनातील काही गोष्टी बदलणार आहेत. ड्रायव्हिंग लायसन्स असेल किंवा आरसी बूक असेल ते सोबत बाळगण्याची गरजही आता उरणार नाही. तर दुसरीकडे दुकानदारांना आता जुनी मिठाईदेखील विकता येणार नाही. वाहन, गॅस, उज्ज्वला योजना, पैसे पाठवण्यासाठी असलेले अनेक नियम आजपासून बदलणार आहेत.

2/

आजपासून टीव्हीची खरेदी करणं थोडं महाग होणार आहे. टीव्हीच्या निर्मितीमध्ये वापरल्या जाणार्‍या ओपन सेल्सच्या आयातीवर ५ टक्के सीमाशुल्क पुन्हा आकारण्याचा निर्णय सरकारने घेतला आहे. यापूर्वी सरकारनं त्यावर एका वर्षासाठी सूट दिली होती. ३० सप्टेंबर रोजी ही मुदत पूर्ण झाली आहे. त्यामुळे ३२ इंचाच्या टीव्हीची किंमत ६०० रूपयांनी तर ४२ इंचाच्या टीव्हीची किंमत १ हजार २०० ते १ हजार ५०० रूपयांपर्यंत वाढणार आहे.

3/

प्रत्येक महिन्याच्या सुरूवातीस, सरकारी कंपन्या एलपीजी आणि नॅचरल गॅसच्या किंमतींमध्ये बदल करतात. सप्टेंबरमध्ये १४.२ किलो आणि १९ किलो गॅस सिलिंडर्सची किंमत कमी करण्यात आली. तसंच ऑक्टोबरमध्ये एलपीजीच्या किंमती कमी होण्याची शक्यता आहे. सणासुदीच्या हंगामात सरकार ग्राहकांना त्याचे फायदे देण्याची शक्यता आहे. यामुळेच ऑक्टोबरमध्ये एलपीजीच्या किंमती कमी होण्याची अपेक्षा आहे.

4/

आजपासून अनेक नियमांमध्ये मोठे बदल करण्यात आले आहेत. विशेषत: वाहतुकीच्या नियमांमध्ये हे बदल झाले आहेत. पोलिसांनी तुम्हाला थांबवल्यास त्यांना डिजिटल डॉक्युमेंट्स दाखवण्याची परवानगी आजपासून सर्वांना देण्यात आली आहे. त्यामुळे आता वाहन चालवताना लायसन्ससहित कोणत्याही प्रकारची कागदपत्रे बाळगण्याची आवश्यकता राहणार नाही.

5/

केंद्र सरकारनं परदेशात पैसे पाठवल्यास टॅक्स आकारण्याशी निगडीत नवा नियम तयार केला आहे. जर तुम्ही परदेशात शिकत असलेल्या आपल्या पाल्यासाठी किंवा राहत असलेल्या आपल्या कोणत्याही नातेवाईंकांची आर्थिक मदत करत असाल तक त्यावर ५ टक्के टॅक्स कलेक्टेड अॅट सोर्सची (टीसीएस) अतिरिक्त रक्कम द्यावी लागणार आहे. फायनॅन्स अॅक्ट २०२० नुसार, रिझर्व्ह बँकेच्या एलआरएस अंतर्गत परदेशात पैसे पाठवणाऱ्या व्यक्तीला टीसीएस द्यावा लागणार आहे. एलआरएस अंतर्गत २.५ लाख डॉलर्स वर्षाला पाठवता येतील. त्यावर कोणताही कर लागणार नाही.

6/

सरकारची लोकप्रिय पंतप्रधान उज्ज्वला योजनेंतर्गत मोफत गॅस सिलिंडरची मुदत ३० सप्टेंबर २०२० रोजी पूर्ण झाली आहे. सरकार या योजनेंतर्गत गरिबांना मोफत एलपीजी कनेक्शन प्रदान करते. करोनामुळे या योजनेंतर्गत मोफत सिलिंडरही देण्यात आले. त्याची तारीख एप्रिलपासून सप्टेंबर या कालावधीसाठी वाढविण्यात आली. १ ऑक्टोबर रोजी विना अनुदानित एलपीजी सिलिंडर आणि व्यावसायिक गॅस दरामध्येही सुधारणा करण्यात येणार आहे.

7/

वाहन चालवताना मोबाईल फोनचा वापर केला जाऊ शकतो, परंतु हा केवळ मार्ग शोधण्यासाठी, नेव्हिगेशनसाठीच असावा. तसेच, यावेळी वाहन चालवताना लक्ष विचलित होऊ नये याची काळजी घ्यावी, असंही स्पष्ट करण्यात आलं आहे. चालकांनी दिलेल्या नेव्हिगेशनसाठी मोबाईलचा वापर कसा करायचा याची नियमावलीही मंत्रालयाने दिली आहे. दरम्यान, वाहन चालवताना चालक फोनवर बोलत असेल तर त्याला अडवल्यास दंडही भरावा लागणार आहे. पोलिसांनी फोनवर बोलताना चालकाला अडवल्यास त्याच्याकडून १ हजार ते ५ हजार रूपयांपर्यंतचा दंड आकारला जाऊ शकतो.

8/

आजपासून ड्रायव्हिंग लायसन्स आणि ई-चलानसह वाहनाच्या कागदपत्रांची नोंद माहिती तंत्रज्ञान पोर्टलद्वारे केली जाणार आहे. परवाना रद्द करणे, ई-चलान नोंदणी यांसारखी सर्व कामे इलेक्‍ट्रॉनिक पोर्टलद्वारे केली जातील.

9/

आयआरडीएआयनं आरोग्य विम्याच्या नियमांमध्ये एक मोठा बदल केला आहे. १ ऑक्टोबरपासून सामान्य दरात अनेक आजार विम्याममध्ये कवर केले जाणार आहेत. आयआरडीएआयनं केलेल्या बदलांचा ग्राहकांना फायदा होणार आहे. याव्यतिरिक्त कंपन्या आता आपल्या मर्जीनुसार ग्राहकांची क्लेम नाकारू शकणार नाहीत.

10/

बँकेच्या ग्राहकांना आता घरबसल्या चेक, डिमांड ड्राफ्ट आणि पे ऑर्डर पिक करण्यासारख्या सेवा देण्यात येणार आहे. तसंच अन्य आर्थिक सुविधाही ग्राहकांना देण्यात येणार आहेत. डोअरस्टेप बँकींग सेवा सुरू झाल्यानंतर आता आर्थिक सेवा ऑक्टोबर महिन्यापासून घरीच मिळणार आहेत.

11/

बाजारात खुली मिठाई विक्री करणाऱ्यांवरही सरकारनं वचक ठेवण्याचा निर्णय घेतला आहे. आता मिठाईच्या दुकानांमध्ये त्याच्या वापराची तारीखही सांगावी लागणार आहे. कोणत्या तारखेपर्यंत मिठाईचं ग्रहकासाठी खाण्यायोग्य असेल हे आता दुकानदारांना सांगावं लागणार आहे. आजपासून देशभरात हा नियम लागू झाला आहे.