करोना संकटात राष्ट्रवादीचे अहमदनगर जिल्ह्यातील पारनेर विधानसभा मतदारसंघातील आमदार निलेश लंके यांनी केलेल्या कार्याची आंतरराष्ट्रीय स्तरावर दखल घेण्यात आली आहे. निलेश लंके यांना प्रतिष्ठीत पुरस्कार प्रदान करण्यात आला आहे. (सर्व फोटो – फेसबुक) -
निलेश लंके यांना 'वर्ल्ड बुक ऑफ रेकॉर्ड्स लंडन' हा पुरस्कार प्रदान करुन गौरवण्यात आलं आहे. यासंदर्भातील माहिती निलेश लंके यांनीच सोशल नेटवर्किंगवरुन फोटो शेअर करत दिली आहे.
-
निलेश लंके यांनी भाळवणी,पारनेर येथे शरद पवार आरोग्य मंदिर हे कोविड केअर सेंटर सुरु केलं आहे. या माध्यमातून त्यांनी आतापर्यंत दहा हजारांहून अधिक रुग्णांना उत्तम आरोग्यसेवा दिली आहे.
-
करोना काळात केलेल्या कामाबद्दल आज मला वर्ल्ड बुक ऑफ रेकॉर्ड्स लंडन या आंतरराष्ट्रीय पुरस्कराने सन्मानित करण्यात आले. माझ्यासारख्या सामान्य कुटुंबातून आलेल्या व्यक्तीला हा सन्मान मिळाला ही खूप मोठी गोष्ट आहे. हे सगळं शक्य झालं माझ्यावर प्रेम कऱणाऱ्या मायबाप जनतेमुळे आणि सहकाऱ्यांमुळे”, असं लंके यांनी ट्विटमध्ये म्हटलं आहे.
-
‘वर्ल्ड बुक ऑफ रेकॉर्ड्स’मध्ये समावेश झालेले निलेश लंके देशातील पहिले आमदार ठरले आहेत.
-
करोना संसर्गामुळे निर्माण झालेल्या आरोग्याच्या समस्येबरोबरच मानसिक, सामाजिक, आर्थिक समस्या निर्माण झाल्या आहेत. या विविध समस्यांचे निराकरण भाळवणी येथील शरदचंद्र पवार आरोग्य मंदिरात (कोविड उपचार केंद्र) केले जाते. त्यासाठी पारनेर-नगरचे आमदार निलेश लंके यांच्यासह शेकडो कार्यकर्ते अहोरात्र कष्ट घेत आहेत.
-
आमदार निलेश लंकेनी कोविड उपचार केंद्रात मुक्काम ठोकला आहे.
-
११०० खाटांच्या भाळवणी येथील कोविड उपचार केंद्रात १०० खाटांना प्राणवायूची सुविधा आहे. करोना संसर्गाची सामान्य लक्षणे असणाऱ्या तसेच प्राथमिक पातळीवर प्राणवायूची आवश्यकता असणाऱ्या रुग्णांवर या ठिकाणी उपचार केले जातात.
-
आवश्यकता भासल्यास रुग्णांना पुढील उपचारासाठी संसर्गाच्या तीव्रतेनुसार पारनेर ग्रामीण रुग्णालय, बूथ रुग्णालय (नगर), जिल्हा सामान्य रुग्णालय तसेच आवश्यकतेनुसार खासगी रुग्णालयात पाठवण्यात येते.
-
भाळवणी येथील कोविड उपचार केंद्र पारनेर-नगर विधानसभा मतदारसंघाबरोबरच नगर, पुणे जिल्ह्यातील जनतेसाठी आधार केंद्र ठरले आहे.
-
प्राथमिक अवस्थेतील संसर्ग झालेल्या रुग्णाला इतरत्र रुग्णालयात जागा मिळाली नाही तरी भाळवणी येथील कोविड उपचार केंद्रात हमखास मिळणार याची खात्री असते. कोणतीही चौकशी न करता रुग्ण थेट भाळवणी येथील उपचार केंद्रात दाखल होतात.
-
या उपचार केंद्रात सरासरी ९०० रुग्ण उपचार घेत आहेत. रुग्णाची प्राणवायूची, तपमानाची तपासणी करण्यास मदत करतात.
-
यादरम्यान रुग्णांच्या, कुटुंबीयांच्या अडचणींविषयी चौकशी सुरू असते. काही अडचणी असतील तर कार्यकर्त्यांमार्फत सोडवण्यात येतात.
-
आपला आमदार आपल्याबरोबर २४ तास असल्याने रुग्णांना मोठा मानसिक आधार मिळतो. त्यातूनच रुग्ण लवकर बरे होण्यास मदत होते.
-
रुग्णांचे मानसिक आरोग्य राखण्यासाठी पहाटे उपचार केंद्रात प्राणायाम, योगासने आणि हलके व्यायाम करून घेतले जातात.
-
आहारतज्ज्ञांच्या सल्ल्यानुसार रुग्णांना प्रथिनयुक्त आहार दिला जातो. सकाळी न्याहारीत काढा, अंडी, फळे दिली जातात. एक वेळच्या जेवणात मांसाहार दिला जातो. रुग्णांची प्रतिकारशक्ती वाढवण्यासाठी प्रथिनयुक्त आहाराबरोबरच फळे, हळदीचे दूध रुग्णांना दिले जाते.
-
दररोज संध्याकाळी प्रवचन, वाद्यवृंद, जादूचे प्रयोग यापैकी एखाद्या धार्मिक अथवा मनोरंजनपर कार्यक्रमाचे आयोजन करण्यात येते.
-
एका बाजूला करोना संसर्गाच्या पार्श्वभूमीवर सर्वत्र दहशतीचे, भीतीचे वातावरण असताना भाळवणी येथील उपचार केंद्रात उत्सवी वातावरण अनुभवायला मिळते.
-
करोनासदृश लक्षणे असणाऱ्या व गृहविलगीकरणात राहून खासगी दवाखान्यात उपचार घेणाऱ्या रुग्णाला किमान २५ ते ३० हजार रुपये खर्च येतो तर रुग्णालयात दाखल झालेल्या रुग्णांना दीड लाख रुपये खर्च येतो. या पार्श्वभूमीवर असताना आमदार लंके यांच्या उपचार केंद्रात एक रुपयाही खर्च येत नाही.
-
आमदार निलेश लंके यांच्या संकल्पनेतून साकारलेल्या या उपचार केंद्राच्या मदतीसाठी हजारो हात सरसावले आहेत.
-
याशिवाय धान्य, भाजीपाला, फळे, दूध, अंडी, किराणा याचा ओघ सुरूच आहे.
-
वडनेर हवेली येथील जाणीव प्रतिष्ठानने दोन लाख रुपये खर्चाची जलशुद्धीकरण यंत्रणा उभारली आहे.
-
भाळवणी येथील भुजबळ कुटुंबाने मंगल कार्यालय व आठ एकर जागा उपचार केंद्रांसाठी विनामोबदला उपलब्ध करून दिली आहे.
-
गेल्या वर्षी, संसर्गाच्या पहिल्या लाटेत पारनेर तालुक्यातील कर्जुले हर्या येथे निलेश लंके यांनी उभारलेल्या कोविड उपचार केंद्रातून ४ हजार ६६८ रुग्ण उपचार घेऊन घरी परतले.
-
संसर्गाच्या भीतीमुळे तसेच माझे व माझ्या कुटुंबीयांचे काय होईल असा विचार करून मी घरी बसलो तर माझ्या मतदारसंघातील जनतेला कोणी वाली राहणार नाही, असं लंके सांगतात.
-
माझ्यावर प्रेम करणारी मतदारसंघातील जनता हेच माझे कुटुंब आहे. माझे काहीही होवो, माझी जनता सुरक्षित राहिली पाहिजे ही माझी भूमिका आहे, असंही लंके यांनी म्हटलं आहे.
-
"मी असुरक्षित असलो तरी चालेल,पण माझी माय-बाप जनता सुखी पाहिजे", असंही ते म्हणतात.
-
शरद पवार यांनीही लंके यांच्या पाठीवर कौतुकाची थाप मारली आहे.
छत्रपती शिवाजी महाराजांचा गनिमीकावा अन् मराठा लष्करी इतिहास, JNU मध्ये आता विशेष केंद्र; कधी सुरू होणार अभ्यासक्रम
